गगनबावडा (प्रतिनिधी) : पर्यटनासाठी प्रसिद्ध असलेल्या गगनबावडा तालुक्यात पर्यटकांची गैरसोय होत असल्याचे एक गंभीर चित्र समोर आले आहे. धुदंवडे ते गगनबावडा या महत्त्वाच्या रस्त्यावर दिशादर्शक फलकांचा अभाव असल्यामुळे स्थानिक प्रवाशांसह बाहेरून येणाऱ्या पर्यटकांना मार्ग शोधताना प्रचंड अडचणींचा सामना करावा लागत आहे. या समस्येमुळे केवळ वेळेचा अपव्यय होत नाही, तर अपघातांचा धोकाही वाढला आहे.
पर्यटनस्थळांकडे जाणारे रस्ते दिशाहीन
मोरजाई पठार, धामणी, कुंभी-अणदूर मध्यम प्रकल्प आणि गगनगड यांसारख्या लोकप्रिय पर्यटनस्थळांकडे जाणाऱ्या रस्त्यांवर कुठेही स्पष्ट दिशादर्शक फलक नाहीत. परिणामी, अनेक पर्यटक जीपीएसवर अवलंबून असतानाही अनेकदा चुकीच्या रस्त्याने जातात. विशेषतः रात्रीच्या वेळी किंवा दाट धुक्यात ही समस्या अधिक गंभीर होते, ज्यामुळे अपघात होण्याची शक्यता वाढते.
स्थानिक नागरिक सांगतात की, रस्त्यावर अनेक धोकादायक वळणे, तीव्र उतार आणि खराब रस्ते आहेत. या ठिकाणी सूचना फलक नसल्याने वाहनचालकांना सावध होण्याची संधी मिळत नाही. यामुळे वेगात गाडी चालवताना अचानक वळण आल्यास गाडीवर नियंत्रण मिळवणे अवघड होते. मागील काही महिन्यांमध्ये या मार्गावर झालेले छोटे-मोठे अपघात याच कारणांमुळे घडल्याचे दिसून आले आहे.
प्रशासनाकडून त्वरित उपाय योजना करावी अशी मागणी मागणी होत आहे.
गगनबावडा तालुका पर्यटनवाढीसाठी प्रयत्न करत असताना, अशा मूलभूत सोयीसुविधांचा अभाव असणे हे दुर्दैवी आहे. हा मार्ग केवळ स्थानिक गावांना जोडणारा नसून, पर्यटन हंगामात येथे येणाऱ्या शेकडो पर्यटकांसाठीही महत्त्वाचा आहे.
या गंभीर स्थितीकडे सार्वजनिक बांधकाम विभाग आणि पर्यटन विभागाने तातडीने लक्ष देऊन या मार्गावर आवश्यक ते दिशादर्शक, सूचना फलक आणि मार्गदर्शक नकाशे लावावेत, अशी जोरदार मागणी होत आहे. वेळेवर ही व्यवस्था केल्यास प्रवाशांची गैरसोय टळेल, अपघातांना आळा बसेल आणि गगनबावडा परिसरातील पर्यटन अधिक सुरक्षित व आनंददायी होईल.
