गोकुळ शिरगाव (सलीम शेख ) : कोल्हापूर जिल्ह्याचे डीवायएसपी (DYSP) सुजितकुमार क्षीरसागर यांनी गोकुळ शिरगावमध्ये गणेशोत्सव शांततेत आणि सुरक्षित वातावरणात साजरा करण्यासाठी मंडळांना आवाहन केले आहे. यासाठी त्यांनी मंडळांच्या प्रतिनिधींसोबत एक बैठक घेतली. या बैठकीत, गणेशोत्सवादरम्यान कायदा आणि सुव्यवस्था राखण्यासाठी आवश्यक असलेल्या नियमांवर चर्चा करण्यात आली.
यावेळी सुजितकुमार क्षीरसागर यांनी मंडळांना डॉल्बीमुक्त गणेशोत्सव साजरा करण्याचे आवाहन केले. तसेच, सर्वोच्च न्यायालयाच्या निर्देशानुसार आवाजाच्या मर्यादेचे पालन करण्याच्या सूचनाही दिल्या. यावेळी त्यांनी गणेशोत्सवातील मिरवणुका आणि इतर कार्यक्रमांसाठी आवश्यक असणाऱ्या परवानग्या वेळेत घेण्याबाबत मार्गदर्शन केले. कोणत्याही वादाशिवाय हा उत्सव शांततेत पार पाडण्याचे महत्त्व त्यांनी स्पष्ट केले.
या बैठकीला गोकुळ शिरगाव पोलीस ठाण्याचे निरीक्षक टी.जे. मगदूम, पोलीस कर्मचारी इजाज शेख आणि इतर पोलीस कर्मचारी उपस्थित होते. याशिवाय, गोकुळ शिरगावचे सरपंच चंद्रकांत डावरे, उपसरपंच शामराव पाटील, ग्रामपंचायत सदस्य तसेच भागातील गणेश मंडळांचे अध्यक्ष व इतर पदाधिकारी मोठ्या संख्येने उपस्थित होते. सर्वांनी मिळून हा उत्सव आदर्श पद्धतीने साजरा करण्याचा निर्धार व्यक्त केला.
