गोकुळ शिरगाव (इरफान मुल्ला ): ‘मिशन झिरो ड्रग्स इन कोल्हापूर’ या मोहिमेला प्रतिसाद देत गोकुळ शिरगाव पोलीस ठाण्याने पंचतारांकित एमआयडीसीतील इंडो काउंट आणि किर्लोस्कर कंपनीमध्ये अमली पदार्थ विरोधी जनजागृती कार्यक्रम आयोजित केला. या कार्यक्रमात, कामगारांना अमली पदार्थांच्या दुष्परिणामांबद्दल माहिती देण्यात आली.
यावेळी गोकुळ शिरगाव पोलीस ठाण्याचे सहायक पोलीस निरीक्षक टी.जे. मगदूम, पीएसआय बादोले, पोलीस हवालदार स्वरूपा पाटील आणि पोलीस कॉन्स्टेबल इजाज शेख यांनी कामगारांना अमली पदार्थ विरोधी कायद्याविषयी मार्गदर्शन केले. त्यांनी अमली पदार्थांचे सेवन केल्यामुळे होणारे शारीरिक, मानसिक आणि सामाजिक दुष्परिणाम सविस्तरपणे समजावून सांगितले.
कार्यक्रमाचा एक भाग म्हणून, सायबर कॉलेज कोल्हापूरच्या विद्यार्थ्यांनी अमली पदार्थांच्या दुष्परिणामांवर आधारित एक प्रभावी पथनाट्य सादर केले. या पथनाट्याने कामगारांमध्ये विषयाची गांभीर्यता अधिक चांगल्या प्रकारे पोहोचवली. यावेळी, कंपनीच्या परिसरात कोणीही अमली पदार्थांची विक्री करताना आढळल्यास त्वरित पोलिसांशी संपर्क साधण्याचे आवाहनही करण्यात आले.
या जनजागृती मोहिमेला इंडो काउंट आणि किर्लोस्कर कंपनीच्या एचआर मॅनेजमेंटने सहकार्य केले. दोन्ही कंपन्यांमधील सुमारे पाचशे कामगार या कार्यक्रमात उपस्थित होते. या उपक्रमामुळे कामगारांमध्ये अमली पदार्थांच्या धोक्यांबद्दल जागरूकता वाढण्यास मदत झाली
