मुरुडमध्ये डॉ. बाबासाहेब आंबेडकर सांस्कृतिक भवन दुर्लक्षित: नागरिकांमध्ये संताप!
मुरगूड (बाळासो कांबळे) : शहरातील डॉ. बाबासाहेब आंबेडकर सांस्कृतिक भवनाची दुरवस्था झाल्याने आंबेडकर नगरमधील नागरिकांनी तीव्र नाराजी व्यक्त केली आहे. इमारतीशेजारीच १५ ते २० वर्षांपूर्वी बांधण्यात आलेली अंगणवाडी इमारत पूर्णपणे निकामी झाली आहे. या इमारतीची बांधणी अत्यंत निकृष्ट दर्जाची असल्याचा आरोप नागरिक करत आहेत.
अंगणवाडी इमारतीचे बांधकाम झाल्यापासून तिचा वापरच करण्यात आला नाही, त्यामुळे ती आता मोडकळीस आली आहे. इमारतीची पायरीवरील फरशी फुटली आहे, दरवाजे आणि खिडक्यांच्या चौकटीही तुटल्या आहेत. नगरपालिकेने लाखो रुपये खर्चून ही इमारत बांधली, पण जर ती वापरातच येणार नव्हती तर ती बांधलीच का, असा प्रश्न नागरिक विचारत आहेत.
नागरिकांच्या मते, हे बांधकाम नगरसेवक आणि ठेकेदार यांच्या संगनमताने झाले असावे. निकृष्ट दर्जाच्या कामामुळे सरकारी निधीचा अपव्यय झाला आहे. या कामासाठी जबाबदार कोण, ठेकेदार की तत्कालीन नगरसेवक, असा सवाल नागरिक करत आहेत.
नगरपालिकेने या प्रकरणी संबंधित ठेकेदारावर कारवाई करावी, अशी मागणी जोर धरत आहे. जनतेच्या पैशांचा गैरवापर आणि सार्वजनिक मालमत्तेची दुरवस्था या दोन्ही गोष्टी गंभीर आहेत. या इमारतीची तातडीने दुरुस्ती करून ती वापरात आणावी, अशी अपेक्षा नागरिकांनी व्यक्त केली आहे. या घटनेमुळे मुरगूड नगरपालिकेच्या कार्यक्षमतेवर प्रश्नचिन्ह निर्माण झाले आहे.
