कधी होणार दुरुस्ती?’; मुरगूड-कागल रस्त्याच्या दुरवस्थेमुळे नागरिक त्रस्त, अपघात झाल्यास जबाबदार कोण?
मुरगूड ( बाळासो कांबळे): : मुरगूड ते कागलला जोडणाऱ्या रस्त्यावरील भडगाव फाटा, चौंडाळ आणि सावर्डे दरम्यानचा ५०० ते ६०० मीटरचा रस्ता गेल्या दोन वर्षांपासून अत्यंत खराब अवस्थेत असल्याने नागरिकांना मोठ्या गैरसोयीला सामोरे जावे लागत आहे. अनेक वाहनांचे या रस्त्यामुळे नुकसान होत असून, मोठा अपघात होण्याची भीतीही व्यक्त केली जात आहे.
हा रस्ता मुरगूडहून सावर्डे, साके, बाचणी, खेबवडे, नंदवाळ, दर्याच वडगावमार्गे पाचगावहून कोल्हापूर शहराला जोडला जातो. त्यामुळे या मार्गावरून दुचाकी, चारचाकी वाहने, एसटी बस, ट्रक आणि टेम्पो यांची सतत वर्दळ असते. असे असूनही, चौंडाळ ते सावर्डे दरम्यानच्या रस्त्याच्या दुरवस्थेकडे सातत्याने दुर्लक्ष होत आहे.
स्थानिक लोकप्रतिनिधी – आमदार, खासदार, जिल्हा परिषद सदस्य, पंचायत समिती सदस्य आणि दोन्ही गावांचे सरपंच – असूनही हा रस्ता दुर्लक्षित का आहे, असा प्रश्न नागरिकांना पडला आहे. वाहने या रस्त्यावरून जाताना अनेक वाहनांचे कमान आणि पट्टे नादुरुस्त झाले आहेत. नागरिकांमध्ये ‘या रस्त्यासाठी आंदोलन करावे लागणार का?’ अशी चर्चा सुरू आहे.
रिपब्लिकन पार्टी ऑफ इंडिया (आठवले) पक्षाच्या निदर्शनास ही बाब आल्यानंतर त्यांनी यावर आवाज उठवला आहे. कोल्हापूर जिल्हा सचिव सतीश माळगे यांच्या मार्गदर्शनाखाली या प्रश्नाची दखल घेतली गेली आहे. ‘मोठा अपघात होऊन लोकांचा जीव गेल्यावरच लोकप्रतिनिधी जागे होणार का?’ असा संतप्त सवाल नागरिक विचारत आहेत. या अपघातांची जबाबदारी सार्वजनिक बांधकाम विभाग, कागल की लोकप्रतिनिधींची, असा परखड प्रश्नही उपस्थित होत आहे. या रस्त्याची तातडीने दुरुस्ती करण्याची मागणी नागरिकांकडून जोर धरत आहे.
