राजारामपुरी (सलीम शेख) : पोलीस अधीक्षक योगेश कुमार गुप्ता यांनी कोल्हापूर जिल्ह्यातील सर्व अवैध धंदे समूळ नष्ट करण्याचे आदेश दिल्यानंतर, अपर पोलीस अधीक्षक डॉ. बी. धीरज कुमार यांच्या नेतृत्वाखालील पथकाने राजारामपुरी पोलीस ठाण्याच्या हद्दीतील उद्यमनगर, चांदनी चौक येथे अवैध मटका अड्ड्यावर छापा टाकला.
या कारवाईत पोलिसांनी निशिकांत अगनाज चोपदार (रा. कसबा बावडा) याला ताब्यात घेतले असून, त्याच्याकडून जुगार खेळण्याचे साहित्य आणि रोख रक्कम असे एकूण ३,३६२ रुपयांचा मुद्देमाल जप्त केला आहे.
या मटका बुकीचा मुख्य सूत्रधार किरण कनाकै (रा. शाडू मिल जनक, राजारामपुरी) हा फरार असून, त्याला पकडण्यासाठी पुढील कारवाईचे आदेश देण्यात आले आहेत. राजारामपुरी पोलीस ठाण्यात आरोपींविरुद्ध जुगार कायद्यानुसार गुन्हा दाखल करण्यात आला आहे.
ही यशस्वी कारवाई पोलीस अधीक्षक योगेश कुमार गुप्ता यांच्या मार्गदर्शनाखाली अपर पोलीस अधीक्षक डॉ. बी. धीरज कुमार यांच्या पथकातील पोलीस निरीक्षक दत्तात्रय देशमुख, सहाय्यक फौजदार दिनकर शेळके, पोलीस अंमलदार सचिन लौहार आणि अभिजीत कोळी यांनी केली आहे. पोलिसांनी नागरिकांना अवैध धंद्यांची माहिती पोलिसांना देण्याचे आवाहन केले असून, यापुढेही अशाच प्रकारच्या कठोर कारवाया सुरू राहतील असे सांगितले आहे
