गोकुळ शिरगावमध्ये ‘महिला सन्मान परिषदे’च्या दारूबंदी आंदोलनाला दारूविक्रेत्यांचा विरोध; जनजागृती गाडी अडवून धमक्या!
गोकुळ शिरगाव (प्रतिनिधी )– गोकुळ शिरगाव येथे अनेक वर्षांपासून ‘महिला सन्मान परिषद’च्या वतीने सुरू असलेल्या दारूबंदीच्या लढ्याला एक वेगळीच धार आली आहे. ग्रामपंचायतीने दारूबंदीसाठी विशेष ग्रामसभा आयोजित केली असताना, जनजागृती करणाऱ्या गाडीला दारूविक्रेत्यांनी अडवून धमकावल्याची धक्कादायक घटना समोर आली आहे. मात्र, ‘महिला सन्मान परिषदे’च्या अध्यक्षा प्रियाताई यांनी दाखवलेल्या कणखर भूमिकेमुळे विरोधकांना माघार घ्यावी लागली आणि दारूबंदीच्या आंदोलनाला अधिक बती मिळाली आहे.
गोकुळ शिरगावमध्ये दारूबंदी व्हावी यासाठी ‘महिला सन्मान परिषदे’ने निवेदन, आंदोलने, निदर्शने अशा अनेक मार्गांनी पाठपुरावा केला होता. या लढ्याची दखल घेऊन गोकुळ शिरगाव ग्रामपंचायतीने दारूबंदीसाठी विशेष ग्रामसभा आयोजित करण्याचा ऐतिहासिक निर्णय घेतला. या ग्रामसभेत जास्तीत जास्त लोकांनी उपस्थित राहावे, यासाठी ग्रामपंचायतीने दवंडी पिटण्यास सुरुवात केली. त्याचबरोबर ‘महिला सन्मान परिषदे’नेही जनजागृतीसाठी एक स्वतंत्र गाडी गावात फिरवत होती. गुरुवारी, ही जनजागृती करणारी गाडी गोकुळ शिरगाव हायवे पूर्व, मुख्य बस स्टॉप येथे पोहोचली असता, काही दारूविक्रेत्यांच्या चमच्यांनी ती गाडी अडवली. त्यांनी गाडीच्या ड्रायव्हरला शिवीगाळ करत, “तू इथे प्रचार करायचा नाहीस. आमचे १२ बार आहेत, ते कसे बंद करतात ते आम्ही बघतोच. पुन्हा प्रचार केलास तर तुझी गाडी जाळून टाकीन,” अशी धमकी दिली. दारूच्या नशेत असलेल्या या तरुणांनी ड्रायव्हरला गाडी बंद करण्यास भाग पाडले.
त्यानंतर ड्रायव्हरने तातडीने ‘महिला सन्मान परिषदे’च्या अध्यक्षा प्रियाताई यांना फोन करून घटनेची माहिती दिली. प्रियाताई घटनास्थळी पोहोचल्यानंतर विरोध करणाऱ्यांची चांगलीच बोबडी वळली. सुरुवातीला त्यांनी नको त्या गोष्टींचा बाऊ करून विषयांतर करण्याचा प्रयत्न केला, पण प्रियाताई यांनी कायद्याचे मुद्दे समोर ठेवून पुरावे मागताच विरोधकांची बोलती बंद झाली. त्यांची सर्व मग्रुरी गळून पडली. प्रियाताई यांनी शांतपणे त्या तरुणांना दारूचे दुष्परिणाम आणि त्यामुळे गावाचे कसे नुकसान होत आहे हे समजावून सांगितले. त्यांच्या समंजसपणा आणि कणखर भूमिकेमुळे त्या तरुणांनाही आपली चूक लक्षात आली. “मॅडम, आम्ही तुमच्याच सोबत आहोत,” असे म्हणत त्यांनी आपल्या कृत्याबद्दल दिलगिरी व्यक्त केली. या घटनेने हे सिद्ध झाले आहे की, दारू विक्रेते लोकांमध्ये चुकीची माहिती पसरवून भ्रम निर्माण करण्याचा प्रयत्न करत आहेत. पण गोकुळ शिरगावमधील महिला सन्मान परिषदेचा हा निर्धार दारूच्या राक्षसाला गुडघे टेकायला लावेल यात शंका नाही.
जनमत:
गोकुळ शिरगावमध्ये महिलांनी सुरू केलेला दारूबंदीचा हा लढा खरोखरच कौतुकास्पद आहे. दारूच्या विरोधात आवाज उठवणे सोपे नाही. अशा परिस्थितीतही महिला सन्मान परिषदेच्या सदस्यांनी दाखवलेला धीर आणि चिकाटी ही समाजासाठी एक प्रेरणा आहे. या घटनेने हे स्पष्ट झाले की, समाजात काही चुकीचे लोक दारूच्या धंद्यापायी लोकांची दिशाभूल करत आहेत. पण या लढ्यात महिलांचा निर्धार आणि कायद्याची साथ मिळाल्यास, दारूबंदी नक्कीच यशस्वी होईल. हे आंदोलन केवळ दारूच्या दुकानांविरुद्ध नाही, तर आपल्या समाजाला ग्रासणाऱ्या एका मोठ्या समस्येविरुद्ध आहे. त्यामुळे गोकुळ शिरगावमधील प्रत्येक नागरिकाने, विशेषतः तरुणांनी, या लढ्यात ‘महिला सन्मान परिषदे’ला साथ देणे गरजेचे आहे.
