हुपरी (सलीम शेख ): गेल्या दोन दिवसांपासून हुपरी येथील अंबिका नगर परिसरात पुन्हा एकदा बिबट्याचे दर्शन झाल्याने नागरिकांमध्ये भीतीचे वातावरण निर्माण झाले आहे. काल रात्री (१२ सप्टेंबर २०२५) रात्री ११ वाजण्याच्या सुमारास गायकवाड यांच्या शेतात बिबट्या फिरताना दिसला. या घटनेमुळे परिसरातील लोक सतर्क झाले असून, वन विभागाला याबाबत माहिती देण्यात आली आहे.
उपलब्ध माहिती आणि छायाचित्रांनुसार, बिबट्या गायकवाड यांच्या गोठ्याशेजारी फिरत होता. ही बाब परिसरातील रहिवाशांसाठी धोक्याची घंटा असून, रात्रीच्या वेळी एकटे बाहेर पडणे टाळण्याचे आवाहन करण्यात येत आहे. वन विभागाने याआधीही या भागात बिबट्याची उपस्थिती असल्याची माहिती दिली होती आणि नागरिकांना सतर्क राहण्यास सांगितले होते. या परिसरातील नागरिकांनी विशेष काळजी घेण्याचे आवाहन करण्यात आले आहे. रात्रीच्या वेळी घराबाहेर पडताना काळजी घ्या, आपल्या पाळीव जनावरांना सुरक्षित ठिकाणी बांधा आणि लहान मुलांच्या हालचालींवर विशेष लक्ष ठेवा. बिबट्या दिसल्यास त्वरित वन विभाग किंवा स्थानिक पोलिसांशी संपर्क साधावा. वन विभाग या बिबट्याला पकडण्यासाठी लवकरच मोहीम सुरू करणार आहे. जोपर्यंत बिबट्या पकडला जात नाही, तोपर्यंत सर्वांनी सतर्क राहणे अत्यंत आवश्यक आहे.
