हुपरी (सलीम शेख) : हुपरी पोलिसांच्या पथकाने हातकणंगले तालुक्यातील पळगड गावाजवळून ९४ हजार ५२० रुपये किमतीचा अवैध दारूसाठा जप्त केला आहे. या प्रकरणी एका आरोपीविरोधात मुंबई दारूबंदी कायदा कलम ६५(ई) अंतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, दिनांक ३० ऑगस्ट २०२५ रोजी संध्याकाळी ६:५० च्या सुमारास बागल यांच्या शेतातून दारूची अवैध वाहतूक होत असल्याची माहिती पोलिसांना मिळाली होती. या माहितीच्या आधारे सहायक पोलीस निरीक्षक सात्ताप्या दगडु सव्हाण यांच्या नेतृत्वाखालील पथकाने घटनास्थळी छापा टाकला.
या छाप्यात पोलिसांना एक काळ्या रंगाची युनिकॉर्न मोटरसायकल (क्रमांक KA-23 ER-6376) आणि त्यावर ठेवलेला दारूचा साठा आढळून आला. यामध्ये जीएम कंपनीच्या ९० मिलीच्या ८४ बाटल्या, टँगोपंच कंपनीच्या ९० मिलीच्या १६ बाटल्या आणि संत्रा कंपनीच्या ९० मिलीच्या १४ बाटल्या होत्या. या सर्व दारूची एकूण किंमत ४,५२० रुपये आहे. दारूसह मोटरसायकलची किंमत ९०,००० रुपये धरून एकूण ९४,५२० रुपयांचा मुद्देमाल जप्त करण्यात आला आहे.
या प्रकरणी अरुणा विलास कोणे (वय ४८, रा. बारवाड, ता. निपाणी, जि. बेळगाव) या आरोपीला ताब्यात घेऊन त्याच्याविरोधात गुन्हा दाखल करण्यात आला आहे. या गुन्ह्याचा पुढील तपास पोलीस हेड कॉन्स्टेबल कांबळे करत आहेत.
