कणेरी (इरफान मुल्ला) : कणेरी येथे शिवकालीन शस्त्रे हा आपल्या इतिहासातील महत्त्वाचा टप्पा असून, हा समृद्ध ऐतिहासिक आणि सांस्कृतिक वारसा नव्या पिढीपर्यंत पोहोचवण्यासाठी अशा प्रदर्शनांची गरज आहे. विद्यार्थ्यांमध्ये या शस्त्रांमधून प्रेरणा निर्माण होईल, असे प्रतिपादन पंचायत समिती करवीरच्या गटशिक्षणाधिकारी अर्चना पाथरे यांनी केले.
त्या केंद्रीय प्राथमिक शाळा कणेरी येथे आयोजित भव्य शिवकालीन शस्त्र प्रदर्शनाच्या उद्घाटनप्रसंगी बोलत होत्या. विद्या मंदिर कणेरी शाळेची विद्यार्थिनी आणि कणेरीचे पोलीस पाटील संग्राम पाटील यांच्या कन्या स्वरदा हिच्या वाढदिवसाचे औचित्य साधून हे प्रदर्शन आयोजित करण्यात आले होते.
ऐतिहासिक शस्त्रांचे दर्शन
या प्रदर्शनामध्ये पुरातन वस्तू, शिवकालीन नाणी, तलवारी, चिलखत, बाण आणि इतर अनेक शिवकालीन शस्त्रे मांडण्यात आली होती. हे ऐतिहासिक प्रदर्शन पाहण्यासाठी कणेरीसह पंचक्रोशीतील विद्यार्थी आणि नागरिकांनी मोठी गर्दी केली. सुमारे तीन हजार विद्यार्थ्यांनी आणि नागरिकांनी या प्रदर्शनाला भेट दिली.
यावेळी व्यासपीठावर कणेरीचे सरपंच निशांत पाटील, शाहू साखरचे संचालक शिवाजीराव पाटील, संग्राहक अमरसिंह पाटील सोनगेकर, एडव्होकेट विजय कदम, एम. डी. पाटील, ग्रामपंचायत सदस्य दत्तात्रय पाटील आदी मान्यवर उपस्थित होते.
कार्यक्रमादरम्यान, मराठा महासंघाचे वसंतराव मुळीक यांनीही प्रदर्शनाला भेट देऊन पाहणी केली आणि आयोजकांना शुभेच्छा दिल्या. यावेळी जिल्हाध्यक्ष शशिकांत पाटील, तालुकाध्यक्ष राजेंद्र खेराडे, दयानंद पाटील आदींसह विद्या मंदिर केंद्रशाळेचे केंद्रप्रमुख संभाजी लोहार यांच्यासह शिक्षक-शिक्षिका मोठ्या संख्येने उपस्थित होते.
