कागल (सलीम शेख ) : राष्ट्रीय महामार्ग पोलीस उपकेंद्र, उजळाईवाडी यांच्या वतीने आज, १७ सप्टेंबर २०२५ रोजी आंतरराष्ट्रीय चालक दिनानिमित्त राष्ट्रीय महामार्ग क्र. ४८ वरील आरटीओ चेक पोस्ट नाका, कागल येथे एक विशेष कार्यक्रमाचे आयोजन करण्यात आले होते. या कार्यक्रमात अवजड वाहनचालक आणि एसटी चालकांशी संवाद साधून त्यांच्या कामाचे महत्त्व अधोरेखित करण्यात आले.
यावेळी, पी.एस.आय रवी गायकवाड यांनी वाहनचालकांशी बोलताना ‘वाहतुकीचे नियम पाळा आणि अपघाताला टाळा’ असा महत्त्वाचा संदेश दिला. त्यांनी चालकांना सुरक्षित प्रवासासाठी वाहतुकीच्या नियमांचे पालन करण्याचे आवाहन केले. पी.एस.आय संजय पवार यांनी ‘वेग मर्यादा सांभाळा, आपल्या कुटुंबाची आणि आपली काळजी घ्या’ अशी कळकळीची विनंती केली, ज्यामुळे वाहनचालकांना त्यांच्या कुटुंबाची आठवण होऊन जबाबदारीची जाणीव झाली.
पोलीस हवालदार अरविंद सनगर यांनी कार्यक्रमाची प्रस्तावना केली आणि उपस्थित सर्वांचे स्वागत केले. तसेच, चेतन बोंगाळे यांनी आभार प्रदर्शन केले, तर पोलीस अंमलदार विशाल मिसाळ यांनी कार्यक्रम यशस्वी केल्याबद्दल सर्वांचे अभिनंदन केले.
या कार्यक्रमात प्रत्येक चालकाला गुलाबपुष्प देऊन सन्मानित करण्यात आले, ज्यामुळे त्यांच्या मनात आपल्या कामाबद्दल अभिमान निर्माण झाला. या उपक्रमामुळे पोलीस कर्मचारी आणि वाहनचालक यांच्यात एक मैत्रीपूर्ण नाते निर्माण झाले, आणि चालकांनीही पोलिसांच्या या कौतुकास्पद भूमिकेचे अभिनंदन केले.
