कागल (सलीम शेख ) : कागल येथील नागरिकांची अनेक वर्षांची मागणी पूर्ण करत, अखेर अनंत रोटो परिसरात प्रत्येक शनिवारी आठवडा बाजार सुरू झाला आहे. कागल नगरपालिकेचे मुख्य कार्यकारी अधिकारी अजय पाटणकर यांच्या विशेष प्रयत्नांमुळे आणि स्थानिक नागरिकांच्या सहकार्यामुळे हा आठवडा बाजार भरणे शक्य झाले आहे.
या परिसरातील नागरिकांना आठवडा बाजाराची सोय व्हावी यासाठी राजे विक्रमसिंह घाटगे विचारमंचचे अध्यक्ष कुंडलिक हिरुगडे यांनी भागातील शेकडो नागरिकांच्या सह्यांसह नगरपालिकेकडे मागणी अर्ज सादर केला होता. या मागणीला सकारात्मक प्रतिसाद देत, मुख्याधिकारी अजय पाटणकर यांनी पुढाकार घेतला आणि आवश्यक कार्यवाही पूर्ण केली. त्यांच्या या प्रयत्नांचे भागातील नागरिक आणि शेतकरी मोठ्या प्रमाणात कौतुक करत आहेत.
हा आठवडा बाजार सुरू झाल्यामुळे स्थानिक शेतकरी आणि व्यापाऱ्यांसाठी एक नवीन व्यासपीठ उपलब्ध झाले आहे, तसेच नागरिकांनाही एकाच ठिकाणी ताजी भाजीपाला आणि इतर वस्तू खरेदी करणे सोपे झाले आहे. यामुळे वेळेची आणि पैशांची बचत होणार असल्याने नागरिकांनी समाधान व्यक्त केले आहे.
या उपक्रमासाठी रहिमान इनामदार, निखिल धनवडे, एस. आर. पाटील सर, अरुण कुराडे, रियाज जमादार वस्ताद मारुती पवार ,सागर कोकाटे,दिनेश कदम,मेजर कांबळे आणि भागातील इतर पदाधिकारी, कार्यकर्ते, नागरिक व शेतकऱ्यांचे मोलाचे सहकार्य लाभले. नगरपालिकेचे मुख्याधिकारी आणि सर्व कर्मचाऱ्यांचे आभार मानत, स्थानिक नागरिकांनी यापुढेही असेच लोककल्याणकारी उपक्रम राबवण्याची गरज आहे. आता या आठवडा बाजाराचे आयोजन दर शनिवारी करण्यात येणार आहे.
