कोल्हापूर (सलीम शेख ) : अमेरिकेचे माजी राष्ट्राध्यक्ष डोनाल्ड ट्रम्प यांनी भारताच्या वस्तूंवर ५० टक्के आयात शुल्क लावल्याच्या निषेधार्थ, हिंदू जनजागृती समितीने आयोजित केलेल्या ‘हिंदू राष्ट्र-जागृती’ आंदोलनांतर्गत आज कोल्हापुरात अमेरिकन कंपनी ‘मॅकडोनाल्ड’च्या विरोधात जोरदार निदर्शने करण्यात आली.
डी. वाय. पाटील मॉलसमोरील मॅकडोनाल्ड स्टोअरसमोर सकाळी ११ वाजता हे आंदोलन सुरू झाले. या आंदोलनात शिवसेना, शिवप्रतिष्ठान, सनातन संस्था आणि हिंदु जनजागृती समितीचे पदाधिकारी व कार्यकर्ते मोठ्या संख्येने सहभागी झाले होते.
या आंदोलनात शिवसेना उपजिल्हाप्रमुख संभाजीराव भोकरे, तालुकाप्रमुख राजू यादव, हिंदु जनजागृतीचे शिवानंद स्वामी, शिवप्रतिष्ठानचे शिवानंद माळी, योगी संत यादव महाराज आणि सनातन संस्थेचे किरण कुलकर्णी यांच्यासह अनेक हिंदुत्ववादी नेते आणि कार्यकर्ते उपस्थित होते. त्यांनी अमेरिकेच्या धोरणांचा निषेध केला आणि भारतीय नागरिकांना अमेरिकेच्या उत्पादनांवर बहिष्कार टाकण्याचे आवाहन केले.
हिंदु राष्ट्र-जागृती आंदोलन या नावाने आयोजित या आंदोलनात सहभागी झालेल्या सर्व कार्यकर्त्यांनी राष्ट्रहिताचा विचार करून अमेरिकेच्या आर्थिक धोरणांविरोधात आपला तीव्र निषेध व्यक्त केला.
