कोल्हापूर (सलीम शेख ) : शहरातील सरनाईक कॉलनी भागात बंद बंगल्याचे कुलूप तोडून घरफोडी करणाऱ्या एका टोळीला कोल्हापूर स्थानिक गुन्हे अन्वेषण शाखेने अटक केली आहे. या कारवाईत पोलिसांनी चोरीला गेलेल्या दोन एलईडी टीव्हीसह एकूण ₹ ३,१३,०००/- किमतीचा मुद्देमाल जप्त केला आहे.
राजारामपुरी, कोल्हापूर येथील रहिवासी समरजितसिंह पाटील यांच्या आजी शारदा चव्हाण यांचा सरनाईक कॉलनी, टाकाळा येथील ‘प्रिया’ बंगला दि. ०६/०९/२०२५ ते ०९/०९/२०२५ या कालावधीत बंद होता. याच संधीचा फायदा घेत अज्ञात चोरट्यांनी बंगल्याच्या दरवाजाचे कुलूप तोडून घरात प्रवेश केला आणि दोन एलईडी टीव्ही, देवघरातील चांदीच्या मूर्ती, चांदीची नाणी व इतर मौल्यवान वस्तू चोरून नेल्या होत्या. याप्रकरणी दि. ०९/०९/२०२५ रोजी राजारामपुरी पोलीस ठाण्यात गुन्हा दाखल करण्यात आला होता.
कोल्हापूर जिल्ह्याचे पोलीस अधीक्षक योगेशकुमार गुप्ता यांनी या गुन्ह्यांचा समांतर तपास करण्याचे आदेश स्थानिक गुन्हे शाखेला दिले होते. पोलीस निरीक्षक रवींद्र कळमकर यांनी तात्काळ तपास पथक तयार केले. या पथकातील पोलीस अंमलदार वैभव पाटील यांना गुप्त बातमीदाराकडून माहिती मिळाली की, ही चोरी आदित्य दिंडे आणि त्याच्या साथीदारांनी केली आहे.
या माहितीच्या आधारे तपास पथकाने कणेरीवाडी कमानीजवळ सापळा रचून तिघांना पकडले. त्यांची चौकशी केली असता त्यांनी आपली नावे आदित्य भीमराव दिंडे (वय २३, रा. राजारामपुरी), वैभव दिलीप कांबळे (वय १९, रा. माधवनगर) आणि सुमित अमर जाधव (वय २१, रा. माधवनगर) अशी सांगितली. त्यांच्या दुचाकीच्या डिकीची तपासणी केली असता पोलिसांना चांदीची नाणी, चांदीच्या मूर्ती, पितळेच्या मूर्ती आणि रोख ₹ ४,०००/- असे साहित्य सापडले.
आरोपींची अधिक चौकशी केली असता त्यांनी ही चोरी साथीदार संदेश शेळके आणि बलराजसिंह दुधाने यांच्या मदतीने केल्याची कबुली दिली. त्यांनी चोरलेले दोन टीव्ही सुमित जाधवच्या घरी ठेवल्याचेही सांगितले. पोलिसांनी तातडीने कारवाई करत आरोपींकडून आणि सुमित जाधवच्या घरातून दोन एलईडी टीव्ही, चांदीची नाणी, मूर्ती, तांब्याची भांडी, रोख रक्कम, मोपेड गाडी आणि मोबाईल हँडसेट असा एकूण ₹ ३,१३,०००/- किमतीचा मुद्देमाल जप्त केला.
या टोळीतील इतर दोन साथीदार अल्पवयीन असल्याचे निष्पन्न झाले आहे. सर्व आरोपी आणि जप्त केलेला मुद्देमाल पुढील कारवाईसाठी राजारामपुरी पोलीस ठाण्यात सुपूर्द करण्यात आला आहे. पुढील तपास राजारामपुरी पोलीस करत आहेत.
ही यशस्वी कारवाई पोलीस अधीक्षक योगेशकुमार गुप्ता आणि अपर पोलीस अधीक्षक धीरजकुमार यांच्या मार्गदर्शनाखाली पोलीस निरीक्षक रवींद्र कळमकर, पोलीस उपनिरीक्षक संतोष गळवे आणि इतर पोलीस अंमलदारांनी केली.
