कोल्हापूर (सलीम शेख ) : जम्मू-काश्मीरमधील श्रीनगर येथील हजरतबल दर्ग्याजवळील फलकावरील राष्ट्रचिन्ह ‘अशोक स्तंभ’ काही समाजविघातक घटकांनी तोडल्याची धक्कादायक घटना समोर आली आहे. या घटनेचा निषेध करत, हिंदू जनजागृती समितीने आज कोल्हापुरात निवासी उपजिल्हाधिकारी संजय तेली यांना निवेदन देत, दोषींवर कठोर कारवाईची मागणी केली.
निवेदनात म्हटले आहे की, ही घटना देशाच्या संविधान, एकात्मता आणि सार्वभौमत्वावर केलेला थेट हल्ला आहे. घटनेचा व्हिडिओ समाजमाध्यमांवर मोठ्या प्रमाणात प्रसारित झाला असून, देशभरात संतापाची लाट पसरली आहे. ‘राष्ट्रीय गौरव अपमान निवारण अधिनियम १९७१’ आणि ‘राजचिन्ह (गैरवापर प्रतिबंध) अधिनियम, २००५’ नुसार अशोक स्तंभ हे संरक्षित राष्ट्रप्रतीक आहे. त्याचा अपमान करणे हा गंभीर गुन्हा असून, तोडफोड करणाऱ्यांवर तातडीने गुन्हे दाखल करून त्यांना अटक करावी, अशी मागणी समितीने केली आहे.
यावेळी निवेदन देताना शिवसेना (उबाठा)आणि हिंदू जनजागृती समितीचे पदाधिकारी मोठ्या संख्येने उपस्थित होते.
