कोल्हापूर (सलीम शेख ) : कोल्हापुरातील बानगे गावात एका म्हशीने दोन तोंडे असलेल्या रेडकाला जन्म दिल्याची दुर्मिळ घटना घडली आहे. या घटनेने परिसरात आश्चर्य व्यक्त होत आहे. मात्र, जन्मानंतर अवघ्या चार तासांतच या रेडकाचा मृत्यू झाल्यामुळे गावकऱ्यांनी हळहळ व्यक्त केली आहे.
कसबा बावडा येथील बानगे गावात ही विलक्षण घटना घडली आहे. येथील शेतकरी सुरेश सुतार यांच्या गोठ्यात एका म्हशीने दोन तोंडे असलेल्या रेडकाला जन्म दिला. या रेडकाला दोन तोंडे, चार डोळे आणि दोन कान होते. हे रेडकू पाहण्यासाठी परिसरातील नागरिकांनी मोठी गर्दी केली होती.
सुरेश सुतार यांच्या म्हशीने अशाप्रकारे विचित्र रेडकाला जन्म दिल्याने गावकऱ्यांनी याला चमत्कार मानले. या घटनेची माहिती मिळताच, पंचक्रोशीतील लोक हे दुर्मिळ रेडकू पाहण्यासाठी गर्दी करू लागले. अनेकांनी याचे फोटो आणि व्हिडीओ काढले.
मात्र, जन्मानंतर अवघ्या चार तासांतच या रेडकाचा मृत्यू झाला. यामुळे, गावकऱ्यांमध्ये निराशेचे वातावरण पसरले. अशा प्रकारची घटना दुर्मिळ असून, जन्मतःच अशा प्रकारच्या विकृतीमुळे रेडकाचा मृत्यू झाल्याचे पशुवैद्यकीय अधिकाऱ्यांनी सांगितले आहे.
