कोल्हापूरच्या ‘शाही दसरा महोत्सवा’ला यंदा प्रमुख राज्य महोत्सवाचा दर्जा; जिल्हाधिकारी कार्यालयात तयारीचा आढावा!
कोल्हापूर (सलीम शेख ) : जिल्हाधिकारी कार्यालय, कोल्हापूर येथे आगामी ‘शाही दसरा महोत्सव २०२५’ च्या तयारीसाठी एक महत्त्वपूर्ण आढावा बैठक पार पडली. यंदा राज्य शासनाने या महोत्सवाला प्रमुख राज्य महोत्सवाचा दर्जा प्रदान केला असून, यामुळे यावर्षीचा दसरा सोहळा अधिक भव्य आणि दिमाखदार होणार आहे.
हा मान केवळ कोल्हापूर शहराचाच नव्हे, तर महाराष्ट्राच्या समृद्ध सांस्कृतिक परंपरेचा गौरव आहे. या ऐतिहासिक महोत्सवाच्या यशस्वी आयोजनासाठी जिल्हा प्रशासनाने कंबर कसली आहे.
२२ सप्टेंबर ते २ ऑक्टोबर या कालावधीत हा महोत्सव होणार असून, यामध्ये कोल्हापूरच्या ऐतिहासिक गादीचा वारसा, समृद्ध परंपरा आणि सांस्कृतिक ओळख यांचे दर्शन घडणार आहे. बैठकीत महोत्सवाच्या नियोजनावर सविस्तर चर्चा करण्यात आली. यावेळी उच्च दर्जाचे सांस्कृतिक कार्यक्रम, विविध मनोरंजनपर उपक्रम आणि कोल्हापूरच्या पर्यटन संधींना चालना देणाऱ्या आकर्षक कार्यक्रमांचे आयोजन करण्याचे ठरले.
या बैठकीला जिल्हाधिकारी ओमल थडगे, पालकमंत्री प्रकाश आंबिटकर आणि इतर प्रशासकीय अधिकारी उपस्थित होते. त्यांनी महोत्सवाच्या प्रत्येक पैलूवर बारकाईने लक्ष दिले.
सर्व कोल्हापूरकरांनी आणि बाहेरून येणाऱ्या पर्यटकांनी या ऐतिहासिक महोत्सवात मोठ्या संख्येने सहभागी होऊन, आपल्या संस्कृतीचा आणि परंपरेचा अभिमान जपावा, असे आवाहन प्रशासनाकडून करण्यात आले आहे. यावर्षीचा दसरा महोत्सव खऱ्या अर्थाने संस्मरणीय ठरेल.
