कोल्हापूर (सलीम शेख ) : कोल्हापूर येथील रंजना शिवाजी पाटील यांना सामाजिक कार्य आणि महिला सक्षमीकरणातील योगदानासाठी ‘इंडिया २४ लाईव्ह’ यांच्या वतीने महाराष्ट्र गौरव पुरस्कार २०२५ जाहीर झाला आहे.
एम.ए. (इतिहास) शिक्षण घेतलेल्या रंजना पाटील या वक्ता, लेखिका आणि महिला समुपदेशक म्हणून कार्यरत आहेत. त्या गेल्या १२ ते १३ वर्षांपासून जिजाऊ ब्रिगेड या राज्यव्यापी महिला संघटनेच्या कार्यात सक्रिय आहेत आणि सध्या संघटनेच्या कोल्हापूर जिल्हा प्रवक्ता म्हणून काम पाहत आहेत.
त्यांनी संघटनेच्या माध्यमातून सामाजिक कार्यात सक्रिय सहभाग घेतला आहे. त्या महिला सबलीकरण आणि सक्षमीकरणासाठी विविध ठिकाणी व्याख्याने देतात. लिखाणाची आवड असल्याने त्या महिलांच्या प्रश्नांवर आणि सामाजिक-राजकीय विषयांवर मासिकांमधून सातत्याने लेखन करतात.
पीडित महिलांना न्याय मिळवून देण्यासाठी त्यांनी आपल्या लेखणीतून आवाज उठवला आहे, तसेच रस्त्यावर उतरून आंदोलने केलेली आहेत. कोल्हापूरच्या अंबाबाई मंदिराच्या प्रश्नांसाठीही त्यांचा लढा सुरू आहे. त्यांच्या या सर्व सामाजिक कामाची दखल घेऊन त्यांना या प्रतिष्ठेच्या पुरस्काराने सन्मानित करण्यात आले आहे.
