मुरगूड नगरपरिषद: पावसाळ्यातही पाणी टंचाई, कमी दाबाने पाणीपुरवठा; नागरिक त्रस्त, जबाबदार कोण?
मुरगूड: (प्रतिनिधी: बाळासो कांबळे): ऐतिहासिक पार्श्वभूमी असलेल्या मुरगूड नगरपरिषदेंतर्गत पाणीपुरवठ्याची गंभीर समस्या नागरिकांना भेडसावत आहे. स्वातंत्र्यकाळापासून अस्तित्वात असलेल्या या नगरपरिषदेच्या पाणीपुरवठा व्यवस्थेवर पावसाळ्यातही प्रश्नचिन्ह उभे राहिले आहे. शहरातील अनेक नागरिकांच्या तक्रारीनुसार, पाण्याचा कमी दाबाने पुरवठा होत असून, विचित्र बाब म्हणजे पावसाळ्यातही पाणीटंचाई जाणवत आहे.
मागील भागात पाणी साठवणूक टाक्यांची संख्या पाहिली, पण आता त्यांच्या क्षमतेवर आणि सध्याच्या स्थितीवर नजर टाकूया:
मुरगूड शहरातील पाणी साठवणूक टाक्यांची स्थिती:
सध्या नगरपरिषदेच्या इमारतीमागील एक टाकी गळतीमुळे बंद आहे. सुस्थितीत असलेल्या चार टाक्यांची माहिती खालीलप्रमाणे:
१) टाकी क्र. १ (कापशी रोड):
- क्षमता: १ लाख लिटर
- सेवा क्षेत्र: पोतदार कॉलनी, सावर्डेकर कॉलनी, सुर्यवंशी कॉलनी, कापशी रोड, विश्राम गृह ते न्यू इंग्लिश स्कूल परिसर.
२) टाकी क्र. २ (पोलीस ठाणे शेजारी, शिवाजी पार्क काॅलनी):
- क्षमता: ३ लाख लिटर
- सेवा क्षेत्र: शिवाजी पार्क, हुतात्मा तुकाराम चौक, अण्णाभाऊ साठे नगर, शांती नगर, गणराज रोड, एकत्ता नगर, आंबेडकर नगर, गुरव कॉलनी, चिमगांव रोड, बाळूमामा कॉलनी.
३) टाकी क्र. ३ (लाल आखाडा तालीम):
- क्षमता: २ लाख लिटर
- सेवा क्षेत्र: महादेव गल्ली, पाटणकर गल्ली, जाधव गल्ली, कुंभार गल्ली, काळभैरव गल्ली, मगदूम गल्ली, शिवाजी रोड, चौगले गल्ली.
४) टाकी क्र. ४ (जनावरांचा अड्डा):
- क्षमता: ४ लाख लिटर
- सेवा क्षेत्र: माधवनगर, सर पिराजी रोड, मुख्य बाजार पेठ, जवाहर रोड, पाटील कॉलनी, ज्ञानेश्वर नगर, महालक्ष्मी नगर, निपाणी फोंडा रोड.
यंदाच्या पावसाळ्यात सर पिराजीराव तलाव आणि वेदगंगा नदीचे पाणी ३ ते ४ वेळा ओव्हरफ्लो होऊन वाहून गेले आहे. पाण्याची नैसर्गिक उपलब्धता चांगली असूनही, मुरगूड शहरातील नागरिकांना पाणी मिळवण्यासाठी अडचणी येत आहेत. शहरातील चारही टाक्यांची एकूण क्षमता लक्षात घेता, पाणीपुरवठा सुरळीत होणे अपेक्षित असताना ही परिस्थिती उद्भवली आहे. शहरातील अनेक भागांत पाण्याची दाब इतका कमी आहे की, नागरिकांना मोटर (पंप) लावल्याशिवाय पाणी मिळत नाही. पाणी मिळवण्यासाठी नागरिकांना विविध उपाययोजना कराव्या लागत आहेत. पावसाळ्यात पाण्याची ही अवस्था असेल, तर उन्हाळ्यामध्ये नागरिकांचे पाण्यावाचून काय हाल होतील, असा गंभीर प्रश्न उपस्थित होत आहे. शहरात चार चांगल्या क्षमतेच्या टाक्या असूनही पाण्याची टंचाई जाणवत आहे. यावरून पाणीपुरवठा व्यवस्थेत मोठ्या प्रमाणात दुर्लक्ष झाल्याचे स्पष्ट होते.
नागरिकांचे हाल थांबणार का?
मुरगूड नगरपरिषदेने या गंभीर समस्येकडे त्वरित लक्ष देण्याची गरज आहे. पाणीटंचाईसाठी जबाबदार कोण? प्रशासकीय यंत्रणेकडून अंमलबजावणीत त्रुटी आहेत की पाणीवितरण व्यवस्थेत तांत्रिक दोष आहेत? यावर नगरपरिषदेने तातडीने उपाययोजना करून नागरिकांची पावसाळ्यातील पाण्याची वणवण लवकरात लवकर थांबवावी, अशी अपेक्षा व्यक्त होत आहे. नागरिकांना आता नगरपरिषदेच्या पुढील भूमिकेकडे लक्ष लागले आहे.
