मुरगूड (बाळासो कांबळे ) : मुरगूड–चिमगावच्या मधोमध असलेल्या बागेच्या ओढ्यावर गंभीर धोका निर्माण झाला आहे. सरपिरीजी तलावाच्या सांडव्यावरून येणारे पाणी तसेच यमगे, दौलतवाडी, करजिवणे, जांभूळखोरा, मुरगूड आणि अवचितवाडी भागातील डोंगरातून येणारे पावसाचे पाणी या ओढ्यात मिसळते. मोठ्या पावसात हा ओढा तुडुंब भरून वाहतो.
अलीकडील पावसामुळे या ठिकाणी बांधण्यात आलेले 30 ते 35 फुटांचे दगडी संरक्षण बांधकाम कोसळले असून वरचा रस्ता देखील खचला आहे. अपघात टाळण्यासाठी फक्त रिबीन बांधण्यात आली आहे, मात्र ती लांबून दिसत नसल्यामुळे रात्रीच्यावेळी गंभीर अपघाताची शक्यता आहे.
स्थानिकांच्या म्हणण्यानुसार, या ठिकाणी वाहतूक मोठ्या प्रमाणात असते. मुरगूड–चिमगाव–गंगापूर–मडीलगे–गारगोटी तसेच मुरगूड–चिमगाव–अवचितवाडी–ठाणेवाडी–बोळावी–आजरा–उत्तुर–गडहिंग्लज–चंदगड या मार्गांवरून वाहनांची सततची रहदारी असते. विशेषतः मंगळवारी मुरगूडच्या आठवडी बाजारामुळे या रस्त्यावर गर्दी वाढते, त्यामुळे मोठा अपघात होण्याची भीती व्यक्त होत आहे.
स्थानिकांनी सार्वजनिक बांधकाम विभागाचे उप अभियंता सी. ए. पाटील, सागर कुंभार व द्विगविजय मांगोरे यांच्याशी संपर्क साधला असता त्यांनी महिनाभरापूर्वी पाहणी केली होती. मात्र, आजतागायत केवळ रिबीन लावण्याशिवाय कोणतीही ठोस उपाययोजना करण्यात आलेली नाही.
या घटनेमुळे जनतेमध्ये तीव्र नाराजी असून, तत्काळ आरसीसी संरक्षण कठडा बांधण्यात यावा व निकृष्ट काम करणाऱ्या ठेकेदारावर फौजदारी गुन्हा दाखल करून कडक कारवाई करण्यात यावी, अशी मागणी रिपब्लिकन पार्टी ऑफ इंडिया (आठवले गट) तर्फे जिल्हा सचिव सतिश माळगे यांच्या मार्गदर्शनाखाली करण्यात आली आहे.
