नागपूर (कोटा न्यूज नेटवर्क): राज्याच्या प्रशासकीय केंद्र असलेल्या मंत्रालयातच बनावट मुलाखती घेऊन शेकडो सुशिक्षित तरुणांची लाखो रुपयांची फसवणूक झाल्याचा धक्कादायक प्रकार उघडकीस आला आहे. मंत्रालयातील काही कर्मचारीही या फसवणुकीत सहभागी असल्याचा संशय व्यक्त करण्यात येत आहे. २०१९ पासून हा प्रकार सुरू असून, नागपूर पोलिसांच्या तपासात आतापर्यंत २०० हून अधिक तरुणांना गंडा घातल्याचे निष्पन्न झाले आहे. महाराष्ट्राच्या प्रशासनाचे हृदय असलेल्या मंत्रालयातच २०१९ पासून थेट बनावट मुलाखती घेऊन शेकडो तरुणांची लाखोंची फसवणूक झाल्याचा धक्कादायक प्रकार समोर आला आहे. या घोटाळ्यामुळे केवळ तरुणांचे आर्थिक नुकसान झाले नाही, तर राज्याच्या सुरक्षिततेवरच प्रश्नचिन्ह निर्माण झाले आहे. या प्रकरणात राज्यपाल आणि सचिवांच्या बनावट स्वाक्षऱ्यांचा वापर करून नियुक्तीपत्रे दिली गेल्याचे उघड झाले आहे.
मंत्रालय हे राज्याचे सर्वात महत्त्वाचे केंद्र आहे. येथे प्रवेशासाठी कठोर सुरक्षा नियम असूनही, एक टोळी इतकी वर्षे मंत्रालयाचा वापर फसवणुकीसाठी करत होती. हा प्रकार सुरक्षा यंत्रणा, पोलीस आणि उच्चपदस्थ अधिकाऱ्यांच्या नजरेतून कसा सुटला, हा सर्वात मोठा प्रश्न आहे. फसवणूक करणाऱ्यांनी बनावट ओळखपत्रे वापरून मंत्रालयात प्रवेश मिळवला, एवढेच नव्हे तर त्यांनी थेट मंत्रालयाच्या दालनातच बनावट मुलाखती घेतल्या. हे सर्व प्रकार अनेक वर्षे बिनबोभाटपणे सुरू होते. या प्रकरणात आतापर्यंत नागपूर पोलिसांच्या कारवाईत एक आरोपी लॉरेन्स हेन्रीला अटक करण्यात आली असून, त्याचे सहा साथीदार अद्याप फरार आहेत. त्यांनी नागपूर, चंद्रपूर आणि वर्धा येथील अनेक तरुणांना कनिष्ठ लिपिकाच्या नोकरीचे आमिष दाखवून लाखोंची फसवणूक केली. या फसवणुकीत बनावट आयडी कार्ड्सचा वापर केला गेला, ज्यामुळे आरोपींना मंत्रालयात सहज प्रवेश मिळाला.
राज्याचे गृहमंत्री देवेंद्र फडणवीस यांच्याकडे राज्याच्या कायदा आणि सुव्यवस्थेची जबाबदारी असताना, इतक्या गंभीर प्रकरणावर त्यांचे मौन आश्चर्यकारक आहे. मंत्रालयाच्या आतच हा गैरप्रकार सुरू होता, त्यामुळे मुख्यमंत्री आणि मंत्रिमंडळाच्या सुरक्षिततेलाही मोठा धोका निर्माण झाला आहे. या घटनेने राज्याच्या प्रशासकीय यंत्रणेतील भ्रष्ट्राचार आणि सुरक्षेतील त्रुटी उघड झाल्या आहेत. गृहमंत्री या गंभीर प्रकरणाची जबाबदारी स्वीकारून कठोर पावले उचलणार का, याकडे आता सर्वांचे लक्ष लागून आहे. राज्यात सध्या अभ्यासू आणि सुसंस्कृत मुख्यमंत्री कार्यरत असताना, त्यांच्या प्रतिमेलाही या घटनेमुळे धक्का पोहोचला आहे. ही फसवणूक केवळ काही तरुणांपुरती मर्यादित नसून, ती राज्याच्या सुरक्षिततेवर केलेला थेट हल्ला आहे, या फसवणुकीमुळे मंत्रालयाच्या सुरक्षा व्यवस्थेवर गंभीर प्रश्नचिन्ह निर्माण झाले आहे. अत्यंत कडक सुरक्षा व्यवस्था असूनही, फसवणूक करणारे मंत्रालयात कसे घुसले आणि त्यांनी थेट कार्यालयांमध्ये मुलाखती कशा घेतल्या, याची चौकशी होणे आवश्यक आहे. या प्रकरणात वरिष्ठ सरकारी अधिकाऱ्यांच्या सहभागाचीही शक्यता नाकारता येत नाही. नागपूर पोलिसांनी या प्रकरणात सखोल तपास सुरू केला असून, आणखी काही आरोपींना अटक होण्याची शक्यता आहे. असे जाणकारांचे मत आहे. या प्रकरणात सखोल चौकशी करून दोषींवर कठोर कारवाई करण्याची मागणी जोर धरत आहे.
