पेटवडगाव (सलीम शेख ) : पेठवडगाव येथील डवरी गल्लीमध्ये एका व्यक्तीचा खून करून फरार झालेल्या आरोपीला कोल्हापूर स्थानिक गुन्हे अन्वेषण शाखेने २४ तासांच्या आत अटक केली आहे. या घटनेमुळे परिसरात एकच खळबळ उडाली होती.पोलीसानी दिलेल्या माहितीनुसार सोमवार, ८ सप्टेंबर २०२५ रोजी रात्री १२:२० च्या सुमारास पेठवडगाव येथे संभाजी धर्मा साळुंखे (वय ५०) यांचा खून करण्यात आला. आरोपी किरण भीमराव जगताप (वय २५, रा. यादवनगर, कोल्हापूर) याने डोक्यात लाकडी फळी मारून साळुंखे यांचा खून केला आणि तो घटनास्थळावरून पळून गेला. या प्रकरणी मयत साळुंखे यांच्या पत्नी मीना साळुंखे यांनी वडगाव पोलीस ठाण्यात फिर्याद दाखल केली. गुन्हा दाखल करण्यात आला.
पोलिसांची तात्काळ कारवाई
घटनेचे गांभीर्य लक्षात घेऊन कोल्हापूर जिल्ह्याचे पोलीस प्रमुख योगेश कुमार यांनी स्थानिक गुन्हे अन्वेषण शाखेला तात्काळ आरोपीचा शोध घेऊन त्याला अटक करण्याचे आदेश दिले. त्यानुसार, पोलीस निरीक्षक रवींद्र कळमकर यांनी सहा. पोलीस निरीक्षक सागर वाघ यांच्या नेतृत्वाखाली एक विशेष पथक तयार केले. या पथकाने आरोपीचा समांतर तपास सुरू केला.
तपासादरम्यान, पोलीस अंमलदार सुरेश पाटील आणि रुपेश माने यांना गुप्त बातमीदाराकडून आरोपी परिते गावातील पोकरणेकर वस्तीमध्ये असल्याची माहिती मिळाली. या माहितीच्या आधारे, सहा. पोलीस निरीक्षक सागर वाघ यांच्या पथकाने अत्यंत गोपनीयता राखून सापळा रचला आणि आरोपीला मंगळवार, ९ सप्टेंबर रोजी ताब्यात घेतले.
पोलिसांनी आरोपी किरण भीमराव जगताप याची सखोल चौकशी केली. चौकशीदरम्यान, त्याने मयत संभाजी साळुंखे यांच्याशी झालेल्या शाब्दिक वादातून रागाच्या भरात डोक्यात लाकडी फळी मारून खून केल्याची कबुली दिली.
आरोपीला पुढील तपासासाठी वडगाव पोलिसांच्या ताब्यात देण्यात आले आहे. पुढील तपास वडगाव पोलीस करत आहेत.
ही यशस्वी कामगिरी पोलीस अधीक्षक योगेश कुमार आणि अपर पोलीस अधीक्षक अण्णासाहेब जाधव यांच्या मार्गदर्शनाखाली पोलीस निरीक्षक रवींद्र कळमकर, सहा. पोलीस निरीक्षक सागर वाघ, पोलीस अंमलदार सुरेश पाटील, रुपेश माने, राम कोळी, विनोद कांबळे, राजेंद्र वरंडेकर, संदीप पाटील आणि अमित सर्जे यांनी केली आहे.
