राधानगरी (सलीम शेख ) : राधानगरी आगारातून सुटणाऱ्या आणि कोकणातून निपाणी व कोल्हापूरकडे जाणाऱ्या तसेच कोल्हापूर व निपाणीहून कोकणात जाणाऱ्या बससेवेसंदर्भात नागरिकांनी महत्त्वपूर्ण मागणी केली आहे. या मार्गावरील राधानगरी ते दाजीपूरदरम्यान असणाऱ्या काही गावांमध्ये बस थांब्यांची व्यवस्था असूनही बस थांबत नसल्याने प्रवाशांची गैरसोय होत आहे. यात प्रामुख्याने न्यू करंजे, मांडरेवाडी, शेळप, बांबर, हसणे, ओलवन आणि दाजीपूर या गावांचा समावेश आहे.
या समस्येमुळे दररोज शाळा-कॉलेजला जाणारे विद्यार्थी, शेतकरी, नोकरदार वर्ग, तसेच शासकीय कामांसाठी राधानगरीला ये-जा करणारे नागरिक आणि रुग्ण यांना मोठ्या अडचणींचा सामना करावा लागत आहे. या मार्गावर बस न थांबल्याने अनेकांना पायपीट करावी लागते, ज्यामुळे त्यांचा वेळ आणि पैसा दोन्ही वाया जातो.
या गंभीर समस्येवर तोडगा काढण्यासाठी स्थानिक नागरिक आणि प्रतिष्ठित व्यक्तींनी राधानगरी आगार व्यवस्थापक मा. उत्तम पाटील यांची भेट घेतली. यावेळी त्यांनी प्रवाशांच्या गैरसोयीची समस्या त्यांच्या निदर्शनास आणून दिली. त्यांनी मागणी केली की, या सर्व बस थांब्यांवर बस थांबण्याची व्यवस्था लवकरात लवकर सुरू करावी, जेणेकरून प्रवाशांची गैरसोय टळेल.
याशिवाय, ग्रामीण भागातील प्रवाशांसाठी नवीन बससेवा सुरू करण्याची सूचनाही यावेळी करण्यात आली. ही सेवा सुरू झाल्यास ग्रामीण भागातील नागरिकांना मोठा दिलासा मिळेल आणि त्यांचे जीवनमान सुधारेल, अशी अपेक्षा व्यक्त करण्यात आली.
यावेळी विश्वास राऊत, सुभाष पाटील, संदिप पटील, राजाराम निउंगरे, सुरेश बचाटे, दादासो सांगावकर, दिलीप पाटील, शामराव चौगले, संजय पारकर, रमेश राणे, शिवाजी वागरे, कृष्णात साळवी, दत्तात्रय चौगले यांच्यासह अनेक मान्यवर उपस्थित होते. आगार व्यवस्थापकांनी या मागणीवर सकारात्मक विचार करण्याचे आश्वासन दिले असून लवकरच यावर योग्य उपाययोजना केली जाईल.
