सांगली (कोटा न्यूज नेटवर्क) : शहरातील शांतीनगर परिसरात रविवारी रात्री एक धक्कादायक घटना घडली असून, कौटुंबिक वादातून पतीने पत्नीचा धारदार शस्त्राने खून केल्याची माहिती समोर आली आहे. या घटनेने परिसरात भीतीचे वातावरण निर्माण झाले असून नागरिकांमध्ये खळबळ उडाली आहे.
मृत महिलेचे नाव काजल प्रशांत एडके (वय अंदाजे ३०) असून, तिचा पती प्रशांत एडके यानेच खून केल्याचा संशय व्यक्त करण्यात आला आहे. घटनेनंतर प्रशांत एडकेने स्वतःहून पोलिस ठाण्यात हजर होऊन गुन्ह्याची कबुली दिली. पोलिसांनी त्याला ताब्यात घेतले असून पुढील तपास सुरू आहे.
पोलिसांनी घटनास्थळी तातडीने पोहोचून मृतदेह शवविच्छेदनासाठी पाठवला आहे. प्राथमिक माहितीप्रमाणे, घरगुती वादातून ही घटना घडल्याचे सांगितले जात आहे. शांतीनगर परिसरात मोठी गर्दी जमली होती, मात्र पोलिसांनी परिस्थिती नियंत्रणात आणली.
सांगली शहर पोलीस विभागाकडून या प्रकरणाचा सखोल तपास सुरू असून, आरोपीविरुद्ध गुन्हा दाखल करण्यात आला आहे. या घटनेमुळे परिसरात चिंता आणि असुरक्षिततेचे वातावरण निर्माण झाले आहे.
