शिरोली ( सलीम शेख ) : शिरोली (ता.हातकणंगले) येथे शनिवारी सायंकाळी शिये फाटा येथे टोप हद्दीत असणाऱ्या फेडरल बँकेसमोर अनैतिक संबंधाच्या संशयातून गणेश शेलार ,विजय पोवार व नितीन पाटील यांच्यात वाद झाला असता गणेश शेलार ने विजय पोवार व नितीन पाटील यांच्या दिशेने बंदूक उंचावून हवेत तीन वेळा गोळीबार केला होता. या घटनेनंतर परिसरात प्रचंड खळबळ उडाली होती. ही घटना समजताच जिल्हा पोलीसप्रमुख योगेशकुमार गुप्ता,अप्पर पोलीस अधीक्षक धीरजकुमार बच्चू ,करवीर चे उपविभागीय अधिकारी सुजितकुमार क्षीरसागर यांनी तात्काळ घटनास्थळी धाव घेतली होती.
घटना घडल्यानंतर अवघ्या पाच मिनिटांत शिरोली एमआयडीसी पोलीस ठाण्याचे सहाय्यक पोलीस निरीक्षक सुनिल गायकवाड यांनी घटनास्थळी धाव घेऊन आरोपींस ताब्यात घेऊन त्याच्याकडून पिस्तुल व काडतुस जप्त केले. तात्काळ जमाव पांगवून परिस्थिती नियंत्रणात आणली होती. रविवारी पहाटे उशिरा धोंडीराम पोवार याने दिलेल्या फिर्यादीनुसार गणेश अर्जुन शेलार याच्यावर गुन्हा दाखल करण्यात आला आहे. रविवारी सकाळी गणेश शेलार याला पेठवडगाव येथील न्यायालयासमोर हजर केले असता त्याला अधिक तपासासाठी तीन दिवसांची पोलीस कोठडी सुनावण्यात आली आहे.अधिक तपास सहाय्यक पोलीस निरीक्षक सुनिल गायकवाड हे करत आहेत.
