उचगाव (सलीम शेख ) : टेंबलाईवाडी, उचगाव पूल ते मणेरमाळ, मुडशिंगी-हुपरी रोडवरील वाहतूक कोंडीमुळे स्थानिक नागरिक आणि वाहनधारक त्रस्त झाले आहेत. विशेषतः दररोज संध्याकाळी उचगाव पुलाखाली मोठ्या प्रमाणात वाहतूक कोंडी होते, ज्यामुळे या परिसरातील रहिवाशांना मोठा त्रास सहन करावा लागत आहे. यामुळे नागरिकांमध्ये तीव्र संताप व्यक्त होत असून, यावर कायमस्वरूपी तोडगा काढण्याची मागणी जोर धरू लागली आहे.
हा परिसर गांधीनगर पोलीस ठाण्याच्या हद्दीत येतो. त्यामुळे या समस्येवर गांधीनगर पोलीस आणि प्रशासनाने तातडीने लक्ष देऊन तोडगा काढण्याची गरज आहे, असे स्थानिकांचे म्हणणे आहे. संध्याकाळी होणारी ही वाहतूक कोंडी पुलापासून उचगाव कमानीपर्यंत जवळपास अर्धा किलोमीटरपर्यंत पसरलेली असते. यामुळे उजगाव कमानीजवळही मोठ्या प्रमाणात कोंडी होते.
या परिसरातील मुख्य बाजारपेठ आणि भाजी मार्केट, तसेच मत्स्य बाजार आणि मांस विक्रीची दुकाने यामुळेही गर्दी वाढते. त्यामुळे दुकानदार आणि ग्राहक दोघांनाही या कोंडीचा सामना करावा लागतो. वाहनांच्या लांबच लांब रांगांमुळे वेळेचा अपव्यय होतो, आणि ध्वनी तसेच वायू प्रदूषणाचा त्रासही वाढतो.
नागरिकांच्या म्हणण्यानुसार, ही समस्या गेल्या अनेक वर्षांपासून कायम आहे आणि प्रशासनाने यावर अद्याप कोणताही ठोस उपाय काढलेला नाही. “अनेक वर्षांपासून हीच समस्या आहे, आम्ही किती दिवस हा त्रास सहन करणार?” असा संतप्त सवाल नागरिकांनी केला आहे.
या गंभीर समस्येवर लवकरच तोडगा निघणार की नागरिकांना अजून अनेक वर्षे हा त्रास सहन करावा लागणार, असा प्रश्न नागरिक विचारत आहेत. यावर तातडीने लक्ष देऊन प्रशासनाने योग्य उपाययोजना करावी, अशी मागणी जोर धरत आहे.
