बिद्रीचे संचालक प्रविणसिंह पाटील यांचा भाजपमध्ये प्रवेश; कार्यकर्त्यांकडून संविधानाचे प्रतीक देऊन शुभेच्छा!
मुरगूड (प्रतिनिधी: बाळासो कांबळे): मुरगूड नगरीचे माजी नगराध्यक्ष, बिद्री साखर कारखान्याचे संचालक, तसेच मुरगूड विश्वनाथ पाटील (अण्णाजी) बँकेचे २० वर्षे चेअरमन आणि मुरगूड नगरपरिषदेचे ३० वर्षे नगरसेवक अशा विविध पदांवर काम केलेले प्रविणसिंह पाटील (दादा) यांनी नुकताच मुंबई येथे भारतीय जनता पक्षात (भाजप) प्रवेश केला आहे. त्यांच्या या राजकीय वाटचालीस मुरगूड आणि कागल तालुक्यातील कार्यकर्त्यांनी भारतीय संविधानाची प्रत देऊन शुभेच्छा दिल्या.
प्रविणसिंह पाटील (दादा) यांच्या राजकीय आणि सामाजिक कारकिर्दीचे वैशिष्ट्य म्हणजे त्यांनी कधीही कोणासाठी राजकारण केले नाही. त्यांनी सत्तेचा उपयोग नेहमीच चांगल्यासाठी केला. बिद्री साखर कारखाना असो वा मुरगूड नगरपरिषद, ज्या ज्या वेळी त्यांनी जबाबदारी घेतली, त्या त्या वेळी ‘हा माझ्या पक्षाचा आणि हा विरोधी पक्षाचा’ असा कोणताही दुजाभाव न ठेवता, सर्वांसाठी अत्यंत प्रामाणिकपणे काम केले. त्यांची ही निष्पक्ष काम करण्याची वृत्ती कायम राहिली आहे. राजकारणामध्ये चढ-उतार येत असतात, पण डगमगून न जाता पहाडी आवाजाने जनतेच्या संपर्कात राहणारे दादांचा जनसंपर्क केवळ मुरगूड गावापुरता मर्यादित नसून, संपूर्ण कागल तालुक्यातून कोणत्याही गावातील व्यक्ती आला तरी त्याचे शंका-समाधान केल्याशिवाय ते थांबत नाहीत. कार्यकर्त्यांवर अन्याय झाल्यास स्वतः लक्ष घालून त्याला न्याय दिल्याशिवाय ते स्वस्थ बसत नाहीत. मुरगूड नगरपरिषद असो किंवा बिद्री साखर कारखाना, त्यांनी कोणालाही न दुखवता सर्वांना सन्मान देण्याची आपली परंपरा कायम जपली आहे. दोनच दिवसांपूर्वी दादांनी मुंबईत भाजपमध्ये प्रवेश केला. याच औचित्य साधून आज स्थानिक कार्यकर्त्यांनी एकत्र येत त्यांना भारतीय सर्वोच्च संविधान देऊन त्यांच्या पुढील राजकीय वाटचालीस शुभेच्छा दिल्या.
यावेळी बाळासो कांबळे, सिकंदर जमादार, कॉम्रेड बबनराव बारदेस्कर, विवेक कवळेकर, प्रल्हाद कांबळे, गजानन साळोखे आणि सुरेश साळोखे यांच्यासह अनेक कार्यकर्ते उपस्थित होते. दादांच्या भाजप प्रवेशामुळे कागल तालुक्यातील राजकीय समीकरणात बदल होण्याची शक्यता असून, त्यांच्या अनुभवाचा आणि व्यापक जनसंपर्काचा फायदा पक्षाला निश्चितच मिळेल, अशी भावना कार्यकर्त्यांनी व्यक्त केली.
