सरन्यायाधीश भूषण गवईंवरील हल्ल्याचा प्रयत्न ‘राष्ट्रद्रोह’; हल्लेखोरावर कारवाई करा: रामदास आठवले यांची तीव्र मागणी

नवी दिल्ली/मुंबई ((कोटा न्यूज़ नेटवर्क)): दि. ७ ऑक्टोबर २०२५ रोजी सर्वोच्च न्यायालयाचे सरन्यायाधीश भूषण गवई यांच्यावर झालेल्या हल्ल्याच्या प्रयत्नाचा रिपब्लिकन पक्षाचे राष्ट्रीय अध्यक्ष तथा केंद्रीय सामाजिक न्याय राज्यमंत्री ना. रामदास आठवले यांनी तीव्र शब्दांत निषेध केला आहे. सरन्यायाधीश गवई यांच्यावर झालेला हा हल्ला केवळ व्यक्तीवर नसून, तो देशाच्या संविधानावरील, लोकशाहीवरील आणि न्यायव्यवस्थेवरील थेट हल्ला असल्याचे आठवले यांनी म्हटले आहे. त्यांनी या हल्ल्याला ‘राष्ट्रद्रोह’ ठरवून आरोपीवर कठोर कारवाई करण्याची मागणी केली आहे.

केंद्रीय राज्यमंत्री रामदास आठवले यांनी या घटनेमागील कारण स्पष्ट करताना म्हटले की, सरन्यायाधीश भूषण गवई हे दलित समुदायातून या सर्वोच्च पदावर आले आहेत. त्यामुळे हा हल्ल्याचा प्रयत्न जातीवादाच्या पूर्वग्रहातून करण्यात आला आहे.

आठवले यांची प्रमुख मागणी आणि भूमिका:

• तीव्र निषेध: सरन्यायाधीश भूषण गवई यांच्यावरील हल्ल्याचा प्रयत्न अत्यंत निंदनीय आहे, याचा आम्ही तीव्र निषेध करतो.
• संविधानावरील हल्ला: सरन्यायाधीशांवरील हल्ला हा केवळ एका व्यक्तीवर नसून, तो संविधानावरील आणि लोकशाहीवरील हल्ला आहे. न्यायप्रिय प्रत्येक नागरिकावर झालेला हा आघात आहे.
• ‘राष्ट्रद्रोह’ ठरवा: हल्लेखोराने केलेला हल्ल्याचा प्रयत्न राष्ट्रद्रोह ठरवून त्या आरोपीवर कठोर कारवाई केली जावी.
• एट्रोसिटी ॲक्टची मागणी: सरन्यायाधीश दलित समुदायातून आले असल्यामुळे, जातीवादी भावनेतून हा हल्ला करण्याचा प्रयत्न झाला. त्यामुळे या हल्लेखोर आरोपीवर एट्रोसिटी ॲक्ट (अनुसूचित जाती आणि अनुसूचित जमाती अत्याचार प्रतिबंधक कायदा) नुसार तातडीने कारवाई करावी.

ना. रामदास आठवले यांनी यावेळी न्यायपालिकेचे महत्त्व अधोरेखित केले. “न्यायपालिका हा लोकशाहीचा प्राण आहे, संविधानाचा प्राण आहे. सरन्यायाधीशांवरील हल्ला हा न्यायपालिकेवरील हल्ला असून, तो लोकशाहीच्या प्राणावर केलेला हल्ला आहे. हा हल्ल्याचा प्रकार राष्ट्रद्रोह ठरविला पाहिजे,” असे आपले मत त्यांनी व्यक्त केले. महामानव डॉ. बाबासाहेब आंबेडकरांनी संविधानातून चातुर्वर्णातून आलेला वर्णभेद, जातीभेद संपुष्टात आणला आहे. तरीही काही लोकांच्या मनात अजूनही जातीभेद, वर्णभेद आणि भेदभाव कायम आहे. “त्याच जातीवादी भावनेतून सरन्यायाधीश भूषण गवई यांच्यावरील हल्ला करण्याचा निंदनीय प्रयत्न झाला आहे,” असे आठवले म्हणाले. हा हल्ला संविधान, लोकशाही आणि समता या संविधानिक मूल्यांवरील हल्ला असून, तो राष्ट्रद्रोह ठरवावा, तसेच गुन्हेगारांवर कठोर कारवाई करावी, अशी मागणी आठवले यांनी केली आहे.