महाराष्ट्राच्या कुस्तीला नवा तारा! पैलवान रणवीर पाटील यांचे तालुका ते जिल्हा स्तरावर नेत्रदीपक यश!

कोल्हापूर (गोकुळ शिरगाव): नुकत्याच झालेल्या शालेय कुस्ती स्पर्धांमध्ये कोल्हापूर जिल्ह्यातील जय हनुमान तालीम मंडळ, भामटे येथील युवा पैलवान रणवीर पाटील याने चमकदार कामगिरी करत कुस्ती क्षेत्राचे लक्ष वेधून घेतले आहे. पहिल्याच वर्षी स्पर्धेच्या आखाड्यात उतरलेल्या या उदयोन्मुख पैलवानाने थेट जिल्हा स्तरावर मजल मारत आपली ताकद आणि कौशल्याची चुणूक दाखवली आहे.

रणवीर पाटील याने शालेय कुस्ती स्पर्धेत अत्यंत प्रभावी खेळ करत तालुकास्तरीय स्पर्धेत प्रथम क्रमांक पटकावला. या दमदार यशानंतर त्याने जिल्हास्तरीय कुस्ती स्पर्धेत जोरदार आव्हान उभे केले. या जिल्हास्तरीय आखाड्यातील अटीतटीच्या आणि थरारक लढतींमध्ये अनेक अनुभवी प्रतिस्पर्धकांना कडवी झुंज देत त्याने द्वितीय क्रमांक मिळवला. पहिल्याच स्पर्धेत तालुका ते जिल्हा स्तरापर्यंत गाजलेल्या या कामगिरीमुळे रणवीर पाटील हा कुस्तीतील एक नवा, आश्वासक चेहरा म्हणून समोर आला आहे. रणवीर पाटील हा गोकुळ शिरगाव येथील अंबुबाई इंग्लिश मीडियम स्कूलमध्ये शिक्षण घेत आहे. त्याने अभ्यासासोबतच कुस्तीच्या मैदानातही आपल्या कुटुंबाची, तालमीची आणि शाळेची मान उंचावली आहे.

रणवीरच्या या लक्षवेधी यशामागे त्याच्या मार्गदर्शकांचे मोलाचे हात आहेत. त्याला वस्ताद सरदार पाटील आणि वस्ताद श्रीवर्धन पाटील यांचे कसदार प्रशिक्षण लाभले. तसेच, त्याला शाळेतील माननीय श्री. के. डी. पाटील सर, श्रेयस पाटील सर आणि नीता संकपाळ मॅडम यांचेही महत्त्वपूर्ण प्रोत्साहन आणि मार्गदर्शन मिळाले. रणवीर पाटील हा वस्ताद श्री. दत्ता पाटील यांचा सुपुत्र असून, त्यांना त्यांचे चुलते शिवाजी पाटील यांचेही सातत्याने मार्गदर्शन मिळत आहे. एका कुस्तीच्या कुटुंबातून आलेल्या या युवा पैलवानाने आपल्या पहिल्याच स्पर्धेने महाराष्ट्राच्या कुस्ती क्षेत्राला एक नवा, तळपणारा तारा दिला आहे. या युवा पैलवानाचे सर्व स्तरांतून अभिनंदन होत आहे.