गोकुळ शिरगाव MIDC मध्ये सिमेंट व्यापाऱ्याचे अपहरण; हॉटेलमध्ये मारहाण करत तमनकवाड्यात नेले!
कणेरी(इरफान मुल्ला): गोकुळ शिरगाव एमआयडीसी परिसरात, गोकुळ चौक येथील एका हॉटेलमध्ये जेवण करत असलेल्या कणेरीवाडीतील सिमेंट व्यापाऱ्याचे पैशाच्या व्यवहारातून सहा संशयितांनी अपहरण केल्याची धक्कादायक घटना मंगळवारी (दि. ७) दुपारी दोनच्या सुमारास घडली. गोकुळ शिरगाव पोलीस ठाण्यापासून अगदी हाकेच्या अंतरावर हा प्रकार घडल्याने परिसरात मोठी खळबळ उडाली आहे. याप्रकरणी गोकुळ शिरगाव पोलीस ठाण्यात सहा संशयितांविरुद्ध गुन्हा दाखल करण्यात आला असून, पोलिसांनी तातडीने कारवाई करत चौघांना अटक केली आहे. मात्र, सिद्धार्थ वैद्य आणि कुणाल जाधव हे दोन आरोपी अद्याप फरार आहेत.
पोलिसांनी दिलेल्या माहितीनुसार, वीरेंद्र कृष्णा पाटील (वय ३५, रा. कणेरीवाडी) हे मंगळवारी दुपारी त्यांचे मित्र राहुल कांबळे यांच्यासह गोकुळ शिरगाव एमआयडीसीतील गोकुळ चौकाजवळ असलेल्या ‘दूर्वा हॉटेल’मध्ये जेवण करत होते. त्याच वेळी संशयित आरोपी प्रवीण चव्हाण, राहुल माती वडर, रोहित वैद्य, सौरभ रमेश वैद्य, सिद्धार्थ वैद्य आणि कुणाल जाधव (सर्व रा. निपाणी) हे हॉटेलमध्ये घुसले. त्यांनी वीरेंद्र पाटील यांना शिवीगाळ करत मारहाण करण्यास सुरुवात केली. या सहा जणांनी वीरेंद्र पाटील यांना जबरदस्तीने मारहाण करत हॉटेलबाहेर घेऊन गेले. तिथे उभ्या असलेल्या चारचाकी वाहनातून त्यांना थेट तमनकवाडा (ता. कागल) येथील डोंगराळ भागात नेण्यात आले. तमनकवाडा येथील एका पत्र्याच्या शेडमध्ये वीरेंद्र पाटील यांना डांबून ठेवण्यात आले. तिथे त्यांना लाथा-बुक्क्यांनी अमानुष मारहाण करण्यात आली. आरोपींपैकी सौरभ वैद्य याने तर लोखंडी पाईपने पाटील यांच्या डाव्या पायावर मारहाण करून त्यांना गंभीर जखमी केले. यानंतर आरोपी रोहित वैद्य याने आपल्या खिशातील बंदूक काढून त्यामध्ये गोळ्या भरल्या आणि वीरेंद्र पाटील यांच्या कपाळाला लावत, “तू आता पैसे दे, नाहीतर तुला जिवंत सोडणार नाही,” अशी जीवे मारण्याची धमकी दिली. पैशाच्या व्यवहारातूनच हे कृत्य घडल्याचे फिर्यादीत स्पष्ट करण्यात आले आहे.
पुढील तपास स. पो. नी. टी. जे. मगदूम यांच्या मार्गदर्शनाखाली सुरू आहे. गोकुळ शिरगाव औद्योगिक वसाहतीसारख्या महत्त्वाच्या ठिकाणी भरदिवसा घडलेल्या या अपहरणाच्या घटनेमुळे औद्योगिक क्षेत्रातील व्यावसायिकांच्या सुरक्षेचा प्रश्न पुन्हा एकदा ऐरणीवर आला आहे. पोलीस फरार आरोपींचा शोध घेत आहेत.
