गोकुळ शिरगाव पोलिसांनी जप्त केले विनापरवाना पिस्टल, जिवंत राउंडसह २.५० लाखांचा. मुद्देमाल; एका आरोपीस घेतले ताब्यात.

गोकुळ शिरगाव (इरफान मुल्ला): पोलीस अधीक्षक (कोल्हापूर) योगेशकुमार गुप्ता यांच्या आदेशानुसार, गोकुळ शिरगाव पोलिसांनी पोलीस ठाणे हद्दीत बेकायदेशीरपणे शस्त्र बाळगणाऱ्या इसमांवर कारवाईची मोहीम हाती घेतली. या मोहिमेंतर्गत गोपनीय माहितीच्या आधारे तपास पथकाने डायमंड हॉटेल परिसरात सापळा रचून एका व्यक्तीस गावठी पिस्तूल आणि जिवंत राउंडसह अटक केली. पोलीस अधीक्षक योगेशकुमार गुप्ता यांनी दिलेल्या सूचनांनुसार, गोकुळ शिरगाव पोलीस ठाणेकडील गोपनीय यंत्रणा सक्रिय झाली होती. शुक्रवार, दिनांक १७/१०/२०२५ रोजी गोकुळ शिरगाव पोलीस ठाणेकडील गोपनीय अंमलदार इजाज महमंद शेख यांना अत्यंत महत्त्वाची माहिती मिळाली. दत्तात्रय कृष्णात पाटील (रा. वाकी वसाहत, सांगाव कसबा, ता. कागल, जि. कोल्हापूर) नावाचा इसम पंचतारांकित एमआयडीसी परिसरातील डायमंड हॉटेलजवळ त्याच्या सिल्वर रंगाच्या कारमधून पिस्तूलसारखे हत्यार घेऊन फिरत आहे. या गोपनीय माहितीच्या आधारावर, गोकुळ शिरगाव पोलीस ठाणेकडील तपास पथकाने तातडीने डायमंड हॉटेलजवळ सापळा रचला. दुपारी अंदाजे १ वाजण्याच्या (१३.०० वाजता) सुमारास, अहिल्यानगर लगत सांगाव (ता. कागल) कडे जाणाऱ्या रोडवर, आरोपी दत्तात्रय कृष्णात पाटील हा त्याची वोक्सवॅगन पोलो कंपनीची सिल्वर रंगाची कार (क्र. MH-०३-BJ२८९३) घेऊन येताना आढळला.

पोलिसांनी तात्काळ त्याला थांबवून कारची कसून तपासणी केली. तपासणीदरम्यान, कारमध्ये विनापरवाना बाळगलेली एक स्टील बॉडी असलेली गावठी पिस्टल आणि सोबत एक जिवंत राउंड पोलिसांना आढळून आले.

पोलिसांनी तात्काळ आरोपी दत्तात्रय पाटील यास ताब्यात घेतले आणि त्याच्याकडून खालीलप्रमाणे एकूण ₹२,५०,०२०/- किमतीचा मुद्देमाल जप्त केला:

ताब्यात घेतलेल्या आरोपी दत्तात्रय पाटील याच्याविरुद्ध गोकुळ शिरगाव पोलीस ठाणेस दिनांक १७/१०/२०२५ रोजी भारतीय शस्त्र अधिनियम (Arms Act) नुसार गुन्हा दाखल करण्यात आला आहे. ही संपूर्ण महत्त्वपूर्ण कारवाई अप्पर पोलीस अधीक्षक (शहर विभाग) डॉ. धिरजकुमार बच्चु, उपविभागीय पोलीस अधिकारी (करवीर विभाग) सुजीतकुमार क्षीरसागर यांच्या मार्गदर्शनाखाली, सहाय्यक पोलीस निरीक्षक टी जे मगदूम मॅडम यांच्यासह तपास पथकातील अंमलदार बादोले, नितेश कांबळे, संदेश कांबळे, पोवार, शेख आणि भोईटे यांनी यशस्वीरित्या पार पाडली. गोकुळ शिरगाव पोलीस ठाणेच्या या उल्लेखनीय आणि प्रभावी कामगिरीबद्दल पोलीस प्रशासनाचे सर्वत्र कौतुक होत आहे.