कणेरीवाडी येथे घरफोडी; बंद घराचे खिडकीचे गज उचकटून ₹७० हजारांचे सोन्याचे दागिने लंपास!
कणेरीवाडी (इरफान मुल्ला ) : गोकुळ शिरगाव पोलीस ठाण्याच्या हद्दीतील कणेरीवाडी, शिवाजीनगर येथे एका बंद घरात अज्ञात चोरट्याने खिडकीचे गज उचकटून प्रवेश करत सुमारे ₹७०,०००/- किमतीचे सोन्याचे दागिने चोरून नेल्याची घटना उघडकीस आली आहे.
याबाबत राजाराम पुंडलिक गुरव (वय ४१, धंदा-गवंडीकाम, रा. कणेरीवाडी, शिवाजीनगर, ता. करवीर, जि. कोल्हापूर) यांनी गोकुळ शिरगाव पोलीस ठाण्यात फिर्याद दाखल केली आहे. फिर्यादी गुरव यांच्या तक्रारीनुसार, त्यांची पत्नी आजारी असल्याने त्यांनी दि. १७/१०/२०२५ रोजी तिला व मुलांना त्यांच्या माहेरी कान्सुली, ता. खानापूर, जि. बेळगाव (कर्नाटक) येथे पाठवले होते. पत्नीला दवाखान्यात उपचारासाठी दाखल करायचे असल्याने, गुरव यांनी दि. २०/१०/२०२५ रोजी सकाळी १०.०० वाजता घराला कुलूप लावले आणि तेही पत्नीच्या माहेरी गेले.
दि. २०/१०/२०२५ रोजी सकाळी १०.०० वा. ते दि. २१/१०/२०२५ रोजी सकाळी ०७.३० वा. या दरम्यान अज्ञात चोरट्याने गुरव यांच्या राहत्या घराच्या खिडकीचा गज उचकटून घरात प्रवेश केला. चोरट्याने घरातील ७०,०००/- रुपये किंमतीचे सोन्याचे दागिने चोरून नेले. यात कानातील कुडे (जुबे) (३ ग्रॅम), कानाचे वेल (२ ग्रॅम), गळ्यातील मणी (२ ग्रॅम), आणि गळ्यातील लहान मुलाचे लॉकेट (१ ग्रॅम) यांचा समावेश आहे.
फिर्यादी गुरव यांनी दिलेल्या तक्रारीवरून गोकुळ शिरगाव पोलिसांनी दि. २२/१०/२०२५ रोजी २.३७ वाजता अज्ञात चोरट्याविरुद्ध गुन्हा दाखल केला आहे. सहा. फौजदार भवारी यांनी हा गुन्हा दाखल केला असून, पुढील तपास कोरे हे करत आहेत.
