हातकणंगले: माले फाटा चौकात कल्याण मटका जुगार खेळणाऱ्या दोघांवर गुन्हा दाखल; रोख रकमेसह साहित्य जप्त

हातकणंगले (सलीम शेख ) : हातकणंगले पोलिसांनी माले फाटा चौकात कल्याण मटका नावाचा बेकायदा जुगार खेळणाऱ्या दोन आरोपींवर महाराष्ट्र जुगार बंदी कायद्यानुसार गुन्हा दाखल केला आहे. ही घटना ९ ऑक्टोबर २०२५ रोजी दुपारी १.३० वाजता माले फाटा चौक येथे उघड्यावर घडली. याप्रकरणी पोलीस कॉन्स्टेबल अमित श्रीकांत कांबळे यांनी फिर्याद दिली आहे. फिर्यादीनुसार, आरोपी शहाजी रंगराव पाटील, रा. माले, ता. हातकणंगले आणि बाळू उर्फ सय्यद खवबुदीन मलीक, रा. दर्ग्याजवळ रुकडी, ता. हातकणंगले हे लोकांकडून पैसे घेऊन त्यांना कल्याण मटका नावाच्या जुगाराच्या अंकांचे चिठ्या लिहून देत होते.
आरोपी शहाजी पाटील हा बुक्की मालक बाळू उर्फ सय्यद खवबुदीन मलीक याच्याकरिता १० टक्के कमिशन बेसवर विनापरवाना बेकायदा जुगार चालवत असताना रंगेहाथ पकडला गेला. या कारवाईत पोलिसांनी आरोपींकडून एकूण ५,००५ रुपये किमतीचा माल जप्त केला आहे. जप्त केलेल्या साहित्यात ५०० रुपयांच्या भारतीय चलनी नोटांसह एकूण ५,००० रुपये रोख रक्कम, पांढऱ्या रंगाच्या कागदावर वेगवेगळे आकडे लिहिलेल्या जुगाराच्या चिठ्या, आणि निळ्या रंगाचा बॉलपेन किंमत ०५ रुपये यांचा समावेश आहे.
हातकणंगले पोलीस ठाण्यात गुन्हा दाखल करण्यात आला आहे. पुढील तपास करोशी हे करीत आहेत. हा गुन्हा ९ ऑक्टोबर २०२५ रोजी सायंकाळी १७.३९ वाजता दाखल करण्यात आला.