हुपरीतील चांदी व्यावसायिकाची फसवणूक उघड – उत्तर प्रदेशमध्ये आरोपी अटक, ३ किलो ४० ग्रॅम चांदीचा मुद्देमाल हस्तगत!
हुपरी (सलीम शेख ) : येथील चांदी व्यावसायिकाची फसवणूक करून त्यांच्याकडील लाखो रुपयांची चांदी घेऊन फरार झालेल्या आरोपीला पोलिसांनी उत्तर प्रदेश येथे जाऊन तांत्रिक तपासाच्या आधारे अटक केली आहे. आरोपीकडून एकूण ३ लाख रुपये किंमतीची ३ किलो ४० ग्रॅम चांदी असा मुद्देमाल हस्तगत करण्यात हुपरी पोलिसांना मोठे यश मिळाले आहे.
घटनेचे अधिक माहिती अशी की फिर्यादी मेघराज संभाजी शेटके (वय २१, तळंदगे रोड, हुपरी) यांची BVS Jewellers ही चांदी कारखाना फर्म आहे. त्यांच्या ठिकाणी आरोपी अरुणकुमार राकेशकुमार भारद्वाज (वय २२, रा. नागला महासिंह, राज्य उत्तर प्रदेश) हा मागील तीन वर्षांपासून चांदीचे काम करत होता.
कामाच्या निमित्ताने फिर्यादी यांनी आरोपीवर विश्वास ठेवून त्यास वेळोवेळी चांदी दिली जात होती. मात्र, दिनांक ३० मे २०२५ रोजी सकाळी ९.३० वाजता फिर्यादी यांचेकडून ५ किलो १२५ ग्रॅम वजनाची, अंदाजे ५ लाख १२ हजार रुपये किंमतीची चांदी घेऊन आरोपी दोन दिवसात परत आणण्याचे सांगून फरार झाला. त्यानंतर त्याने ती चांदी परत न करता अप्रामाणिकपणे स्वतःकडे ठेवल्याने फसवणुकीचा प्रकार उघड झाला.
सदर प्रकरणी हुपरी पोलीस ठाण्यात गुन्हा नोंदवण्यात आला. तपास पोलीस उपनिरीक्षक प्रसाद कोळपे यांनी मोबाईल तांत्रिक माहितीच्या आधारे आरोपीचा माग काढला.
वरिष्ठ अधिकाऱ्यांच्या मार्गदर्शनाखाली पोलीस उपनिरीक्षक प्रसाद कोळपे, पोलीस हेड कॉन्स्टेबल युवराज कांबळे, प्रकाश मांडवकर व पोलीस कॉन्स्टेबल एकनाथ भांगरे यांच्या पथकाने उत्तर प्रदेशातील कचौरा (ता. सिकंदरा राऊ, जि. हाथरस) येथे छापा टाकून आरोपीला ताब्यात घेतले.
त्याच्याकडून ३ किलो ४० ग्रॅम वजनाची, सुमारे ३ लाख रुपये किंमतीची चांदी हस्तगत करण्यात आली. आरोपीला हुपरी येथे आणून न्यायालयात हजर करण्यात आले असून त्याला ५ दिवसांची पोलीस कस्टडी देण्यात आली आहे.
या कारवाईसाठी पोलीस अधीक्षक योगेशकुमार गुप्ता यांनी तपास पथकाचे कौतुक केले आहे.
हुपरी पोलीस ठाणे – पोलीस निरीक्षक एन. आर. चौखंडे यांच्या मार्गदर्शनाखाली कारवाई पार पडली.
