इचलकरंजी (सलीम शेख) : खासगी प्राथमिक शिक्षण संघटना इचलकरंजी यांच्या वतीने येथील घोरपडे नाट्यगृह येथे आदर्श शिक्षण पुरस्कार आणि विद्यार्थ्यांना बक्षीस वितरण सोहळा नुकताच मोठ्या उत्साहात संपन्न झाला. शिक्षण क्षेत्रात उत्कृष्ट कार्य करणाऱ्या शिक्षकांचा गौरव आणि गुणवंत विद्यार्थ्यांना प्रोत्साहन देण्यासाठी या कार्यक्रमाचे आयोजन करण्यात आले होते.
आमदार राहुल आवाडे आणि हातकणंगले विधानसभा मतदारसंघाचे आमदार दलितमित्र डॉ. अशोकराव माने (बापू) यांच्या शुभहस्ते हा सोहळा पार पडला. तसेच, महाराष्ट्र राज्य वस्त्रोद्योग महामंडळाचे अध्यक्ष अशोकराव स्वामी यांची या कार्यक्रमाला प्रमुख उपस्थिती लाभली.
यावेळी इचलकरंजी महानगरपालिकेचे शिक्षण अधिकारी बी. एस. कासार, महाराष्ट्र राज्य खासगी प्राथमिक शिक्षण समितीचे अध्यक्ष भरत रसाळे, शहराध्यक्ष प्रशांत गुरव, कार्याध्यक्ष शितल खानाज, कार्याध्यक्ष सचिन वारे, आय. टी. एस. परीक्षा प्रमुख सागर मगदूम, आय. टी. एस. प्रमुख वैशाली पाटील, आय टी. एस. प्रमुख भरत भोई यांच्यासह परिसरातील शिक्षक, शिक्षिका, नागरिक, पालक आणि संघटनेचे पदाधिकारी मोठ्या संख्येने उपस्थित होते.
उपस्थित मान्यवरांच्या हस्ते आदर्श शिक्षण पुरस्कारांचे वितरण करण्यात आले आणि विद्यार्थ्यांनी विविध स्पर्धांमध्ये मिळवलेल्या यशाबद्दल त्यांचे बक्षीस देऊन अभिनंदन करण्यात आले. मान्यवरांनी आपल्या भाषणातून शिक्षकांचे महत्त्व आणि विद्यार्थ्यांच्या उज्ज्वल भवितव्यासाठी शिक्षकांनी घेतलेल्या प्रयत्नांचे कौतुक केले. खासगी प्राथमिक शिक्षण संघटनेने आयोजित केलेल्या या सोहळ्यामुळे शिक्षक व विद्यार्थ्यांमध्ये उत्साहाचे वातावरण निर्माण झाले.
