हिंगोणा/सावखेडा (प्रतिनिधी : बाळसो कांबळे): हिंगोणा-सावखेडा जिल्हा परिषद गटातील आगामी निवडणुकीच्या पार्श्वभूमीवर राजकीय वातावरण ढवळून निघाले आहे. या गटात सध्या सर्वाधिक चर्चेत असलेले आणि ‘जनतेचा माणूस’ म्हणून ओळखले जाणारे तरुण, सुशिक्षित आणि प्रामाणिक कार्यकर्ते श्री. अमित सिराज तडवी यांची उमेदवारी निश्चित झाली आहे. समाजहितासाठी सतत कार्य करणाऱ्या या कार्यकर्त्याच्या नेतृत्वाबद्दल स्थानिक जनतेत आणि विशेषतः युवक वर्गात प्रचंड उत्साहाचे वातावरण निर्माण झाले आहे.
अमित तडवी हे केवळ राजकारणी नसून, लोकांसाठी लढणारे खरे जनसेवक आहेत. त्यांनी गेल्या अनेक वर्षांपासून सामाजिक, शैक्षणिक, आरोग्य, महिला सबलीकरण, क्रीडा, सांस्कृतिक आणि माहिती अधिकार पत्रकारिता अशा विविध क्षेत्रांत उल्लेखनीय कार्य केले आहे. पत्रकार म्हणून त्यांनी अनेक सामाजिक प्रश्नांना वाचा फोडून शासनाच्या योजनांचा लाभ गरजू लाभार्थ्यांपर्यंत पोहोचवण्यासाठी नेहमीच पुढाकार घेतला आहे. विशेषतः निराधार, विधवा, अनाथ, अपंग आणि ज्येष्ठ नागरिकांसाठी त्यांनी केलेले प्रयत्न अत्यंत कौतुकास्पद ठरले आहेत. त्यांच्या पुढाकाराने गावोगावी जनजागृती शिबिरे, आरोग्य तपासणी शिबिरे, शैक्षणिक मार्गदर्शन उपक्रम तसेच माहिती अधिकार मोहिमा यशस्वीपणे राबवण्यात आल्या आहेत. शासनाच्या विविध लाभ योजनांचे दरवाजे त्यांनी सामान्य जनतेसाठी खुले केल्यामुळे जनतेच्या मनात त्यांच्याबद्दल विश्वास आणि आपुलकीची भावना निर्माण झाली आहे.
अमित तडवी यांच्या शांत, संयमी आणि लोकाभिमुख कार्यपद्धतीमुळे आज युवक वर्ग त्यांच्या पाठीशी भक्कमपणे उभा आहे. महिलांमध्येही त्यांच्या कामाबद्दल आत्मीयता असून, अनेक स्वयं-सहायता गटांच्या माध्यमातून त्यांनी ग्रामीण महिलांना आत्मनिर्भरतेचा मार्ग दाखवला आहे. स्थानिक नागरिक, मान्यवर आणि कार्यकर्त्यांच्या मते “अमित तडवी हे केवळ राजकारणी नाहीत, तर लोकांसाठी लढणारा खरा जनसेवक आहेत.” यापूर्वी चोपडा विधानसभा निवडणूक लढवून त्यांनी राजकीय क्षेत्रात स्वतःचा ठसा उमटवला आहे. अपार लोकसहभाग आणि प्रामाणिक कार्यनिष्ठेमुळे आज हिंगोणा-सावखेडा गटात त्यांची लोकप्रियता दिवसेंदिवस वाढत आहे.
अमित तडवी यांचे कार्य गौरव, प्रामाणिकपणा आणि जनहिताची दिशा दाखवणारे आहे. राजकीय क्षेत्रात स्वच्छ प्रतिमा, पारदर्शक कार्यपद्धती आणि समाजाशी असलेली बांधिलकी यामुळेच मतदारांमध्ये त्यांच्याबद्दल विश्वासाचे वातावरण आहे. सध्या गावोगावी, चौकाचौकात आणि युवकांच्या चर्चांमध्ये ‘जनतेचा माणूस अमित तडवीच हवेत!’ असा एकच नारा घुमत आहे. स्थानिक नागरिकांना ठाम विश्वास आहे की, जर अमित तडवींना जिल्हा परिषदेत संधी मिळाली, तर ते विकासाचे आणि पारदर्शक प्रशासनाचे नवे पर्व सुरू करतील. त्यांचे जनतेशी असलेले नाते हे केवळ राजकीय नाही, तर भावनिक आहे आणि हीच त्यांची खरी ताकद मानली जात आहे.
जनतेचा उमेदवार, लोकाभिमुख नेतृत्व आणि सेवाभावी कार्यकर्ता म्हणून हिंगोणा-सावखेडा गटात आगामी निवडणुकीत अमित तडवी यांचे नाव अग्रक्रमाने चर्चेत आहे.
