न्यायमूर्ती भूषण गवई यांच्यावर झालेल्या हल्ल्याचा निषेध – कागल येथील सामाजिक संस्थेची जिल्हाधिकाऱ्यांकडे मागणी
कागल (बाळासो कांबळे ): भारतीय न्यायव्यवस्थेवर झालेल्या अलीकडील हल्ल्याचा तीव्र निषेध व्यक्त करत ‘लोककल्याण समता बहुउद्देशीय सामाजिक सेवाभावी संस्था, कागल’ या संस्थेने जिल्हाधिकाऱ्यांकडे निवेदन सादर केले. सर्वोच्च न्यायालयाचे न्यायमूर्ती मा. श्री. भूषण गवई यांच्यावर न्यायालयीन कामकाजादरम्यान झालेल्या बूटफेक हल्ल्याची ही घटना अत्यंत दुर्दैवी आणि लोकशाही व न्यायसंस्थेवर झालेला गंभीर प्रहार असल्याचे संस्थेने नमूद केले. संस्थेच्या निवेदनात म्हटले आहे की, भारतीय न्यायव्यवस्था ही लोकशाही व्यवस्थेचा आधारस्तंभ असून तिचा अपमान म्हणजे देशाच्या न्याय, समता आणि स्वातंत्र्याच्या मूल्यांवर आघात आहे. न्यायालय हा सर्व समाजघटकांना समान न्याय देणारा पवित्र स्थान आहे, त्यामुळे न्यायसंस्थेचा सन्मान राखणे हे प्रत्येक नागरिकाचे कर्तव्य आहे. संस्थेने शासनाला आवाहन केले की, या घटनेतील संबंधित व्यक्तींवर कठोर कारवाई करण्यात यावी, तसेच अशा प्रकारचे प्रकार पुन्हा घडू नयेत यासाठी जनजागृती आणि शैक्षणिक उपाययोजना कराव्यात. न्यायव्यवस्थेचा सन्मान राखणे आणि लोकशाहीच्या रक्षणासाठी प्रशासनाने ठोस पावले उचलावीत, अशी मागणी या निवेदनाद्वारे करण्यात आली.
या निवेदनावर सत्ताप्पा कांबळे, आर. आर. प्रधान, सुभाष बंडू कांबळे, एम टी सामंत दिलीप मारुती कांबळे आदींच्या स्वाक्षऱ्या असून प्रत जिल्हाधिकाऱ्यांबरोबर तहसीलदार, कागल व गुरुवर्य पोलीस स्टेशन, मुरगूड यांनाही पाठविण्यात आली आहे.
