‘फिल्टर हाऊस कचऱ्याचे की पाण्याचे?’ – मुरगूड नगरपरिषद प्रशासनाच्या दुर्लक्षामुळे नागरिकांचे आरोग्य धोक्यात!
मुरगूड- (प्रतिनिधी-बाळासो कांबळे): मुरगूड नगर परिषदेच्या पाणी फिल्टर हाऊसच्या अगदी शेजारी कचऱ्याचे मोठे साम्राज्य पसरले असून, या गंभीर परिस्थितीमुळे ‘फिल्टर हाऊस कचऱ्याचे की पाण्याचे?’ असा प्रश्न सामान्य जनतेला पडला आहे. मुरगूड नगरपरिषद प्रशासनाच्या अक्षम्य दुर्लक्षामुळे नागरिकांचे आरोग्य धोक्यात आले आहे.
फिल्टर हाऊसच्या परिसरात प्लास्टिकच्या पिशव्या, कागदाचे ढीग, औषधे व पाण्याच्या रिकाम्या बाटल्या, खाद्यपदार्थ, कुजलेले इतर पदार्थ, आणि खरकट्या पत्रावळी मोठ्या प्रमाणात साचल्या आहेत. या कचऱ्यामध्ये अनेकदा आग लावली जाते, ज्यामुळे सर्वत्र धुराचे आणि दुर्गंधीचे वातावरण निर्माण झाले आहे. या कचऱ्यामुळे संपूर्ण परिसरात प्रचंड दुर्गंधी पसरली आहे, ज्यामुळे नागरिकांना मोठ्या त्रासाला सामोरे जावे लागत आहे. पाणी फिल्टर हाऊसच्या ठिकाणीच कचऱ्याचे ढीग साचल्याने गावातील पाणीपुरवठ्याच्या गुणवत्तेवर गंभीर परिणाम होण्याची आणि नागरिकांच्या आरोग्याला धोका निर्माण होण्याची भीती व्यक्त होत आहे. प्रशासन विभाग आणि स्वच्छता विभागाच्या या निष्काळजीपणामुळे ही चिंताजनक परिस्थिती निर्माण झाली आहे. स्वच्छ आणि शुद्ध पाण्याचा पुरवठा होणे अपेक्षित असताना, कचऱ्यामुळे दूषित होण्याची शक्यता बळावली आहे.
या फिल्टर हाऊसच्या उत्तर-दक्षिण दोन्ही बाजूंना जनावरांचा आठवडी बाजार भरतो. तसेच, याच फिल्टर हाऊस जवळून माधव नगरकडे जाण्याचा रस्ता असल्याने नागरिकांची या ठिकाणावरून सतत ये-जा असते. मात्र, कचऱ्याची दुर्गंधी इतकी तीव्र आहे की, या ठिकाणावरून जाताना नागरिकांना नाकाला हात लावूनच जावे लागते. नगर परिषदेचे अधिकारी या गंभीर प्रकरणाकडे जाणूनबुजून दुर्लक्ष करत असल्यामुळे नागरिकांमध्ये संताप आहे. नागरिकांकडून वारंवार मागणी करूनही प्रशासनाने अद्याप कोणतीही ठोस उपाययोजना केली नाही.
१. नगर परिषदेच्या अधिकाऱ्यांनी या प्रकरणाची गंभीर दखल घ्यावी. २. तात्काळ कचरा काढून टाकून या ठिकाणाचे शुद्धीकरण करावे. ३. यापुढे कोणीही कचरा टाकू नये यासाठी त्या ठिकाणी तातडीने सूचना फलक (बोर्ड) लावण्यात यावा. मुरगूड नगरपरिषद ‘स्वच्छ मुरगूड, सुंदर मुरगूड’ हा आपला नारा जपणार का? आणि नागरिकांच्या आरोग्याचा प्रश्न त्वरित सोडवणार का? याकडे येथील नागरिकांचे लक्ष लागून राहिले आहे. प्रशासनाने त्वरित कारवाई न केल्यास तीव्र आंदोलन छेडण्याचा इशारा नागरिकांनी दिला आहे.
