हरवलेली १३ लाखांची सोन्याची बॅग परत मिळवून देणाऱ्या वाहतूक पोलिसांचे कौतुक: प्रामाणिकतेचा आदर्श!
कोल्हापूर (सलीम शेख): कोल्हापूर शहर वाहतूक नियंत्रण शाखेतील दोन दक्ष आणि प्रामाणिक पोलीस अंमलदारांनी नागरिकांसमोर एक उत्कृष्ट आदर्श उदाहरण ठेवले आहे. कोल्हापूर शहरातील मध्यवर्ती बसस्थानक (सीबीएस) परिसरात एका महिलेची तब्बल १३ लाख रुपये किमतीचे ११ तोळे सोन्याचे दागिने आणि रोख रक्कम असलेली पर्स हरवली होती. मात्र, वाहतूक पोलिसांच्या तत्परतेमुळे आणि प्रामाणिकपणामुळे ही मौल्यवान बॅग अखेर मूळ मालकिणीकडे सुखरूप परत पोहोचवण्यात आली.
वाहतूक शाखेतील पोलीस हेड कॉन्स्टेबल धर्मेंद्र बगाडे आणि राजू पाटील हे दोघे पोलीस अंमलदार मध्यवर्ती बसस्थानक परिसरात नियमितपणे गस्त घालत होते. गस्तीदरम्यान त्यांना बसस्थानकाजवळील बॅरेकेटींगजवळ एक लेडीज पर्स (हॅन्डबॅग) आढळून आली. त्यांनी पर्सची पाहणी केली असता, त्यामध्ये ११ तोळे वजनाचे सोन्याचे दागिने आणि १,१०० रुपये रोख रक्कम असल्याचे दिसून आले. या मौल्यवान वस्तूंमुळे त्यांनी तात्काळ पुढील कार्यवाही सुरू केली. पोलिसांनी त्वरीत पर्समधील कागदपत्रांची चौकशी केली. त्यांना पर्समध्ये आधारकार्ड सापडले, ज्यावरून जान्हवी प्रमोद वरेकर (रा. करक, ता. राजापूर, जि. रत्नागिरी — सध्या पुणे) असे नाव निष्पन्न झाले. याच दरम्यान, वाहतूक शाखेतील दुसरे पोलीस अंमलदार आनंदा पंदारे यांच्यामार्फत महत्त्वपूर्ण माहिती मिळाली की, सदर महिला त्यांची चुलत बहीण आहे.
माहिती मिळाल्यावर पोलिसांनी तात्काळ श्रीमती जान्हवी वरेकर यांना पोलीस चौकीवर बोलावून घेतले. त्यांच्या ओळखीची खात्री पटल्यानंतर, हरवलेली पर्समधील सर्व सोन्याचे दागिने आणि रोख रक्कम त्यांच्या स्वाधीन करण्यात आली. यावेळी बोलताना श्रीमती वरेकर यांनी सांगितले की, त्यांच्या आईच्या निधनानंतर त्या आपटे नगर, कोल्हापूर येथे धार्मिक विधींसाठी आल्या होत्या. विधी आटोपून त्या सीबीएस बसस्थानकावरून पुण्याकडे जाण्यासाठी रिक्षातून उतरत असताना, त्यांची पर्स चुकून रिक्षातून बाहेर पडली आणि हरवली. “एवढे मौल्यवान दागिने आणि रोख रक्कम हरवल्यामुळे मी खूप चिंताग्रस्त झाले होते, पण कोल्हापूर वाहतूक पोलिसांच्या प्रामाणिकपणामुळे आणि तत्परतेमुळे ती सुरक्षित परत मिळाल्याने मला खूप समाधान वाटले,” असे त्या म्हणाल्या.
सदर बॅग आणि त्यातील सर्व दागिने पोलीस अधीक्षक योगेश कुमार, उपविभागीय पोलीस अधिकारी (शहर विभाग) प्रिया पाटील, आणि पोलीस निरीक्षक नंदकुमार मोरे यांच्या उपस्थितीत मूळ मालकिणीकडे सुपूर्द करण्यात आले. या आदर्शवत घटनेनंतर कोल्हापूर शहरवासीयांकडून पोलीस हेड कॉन्स्टेबल धर्मेंद्र बगाडे आणि राजू पाटील यांच्या प्रामाणिकतेचे आणि सचोटीचे मोठ्या प्रमाणात कौतुक होत आहे. नागरिकांच्या विश्वासाला न्याय देणाऱ्या या उत्कृष्ट कार्याबद्दल पोलीस अधीक्षक योगेश कुमार यांनी दोन्ही अंमलदारांना प्रत्येकी ३,००० रुपयांचे रोख पारितोषिक जाहीर करून त्यांचा गौरव केला. या प्रामाणिक पोलिसांनी खाकी वर्दीचा मान वाढवत, संपूर्ण पोलीस दलासाठी अभिमानास्पद कामगिरी केली आहे.
