Uncategorizedमहाराष्ट्र ग्रामीण

कोल्हापूर-राधानगरी मार्गावर भीषण अपघात! आयशर टेम्पोच्या धडकेत एकाच कुटुंबातील तिघे दगावले, एका चिमुकल्याची प्रकृती चिंताजनक

कोल्हापूर (सलीम शेख): कोल्हापूर-राधानगरी महामार्गावर आज (मंगळवार) दुपारी १२ वाजताच्या सुमारास एक अत्यंत हृदयद्रावक आणि भीषण अपघात झाला. कौलव गावाजवळ झालेल्या या अपघातात एकाच कुटुंबातील तीन सदस्यांचा मृत्यू झाला असून एक लहान मुलगा गंभीर जखमी आहे. लक्ष्मीपूजनाच्या तोंडावर झालेल्या या घटनेमुळे परिसरात शोककळा पसरली आहे.

मिळालेल्या माहितीनुसार, राधानगरीहून कोल्हापूरकडे भरधाव वेगाने येणाऱ्या एका आयशर टेम्पोने (क्रमांक एमएच १४ डीएम ९८३६) भोगावतीकडून राधानगरीकडे जाणाऱ्या एका मोटरसायकलला (क्रमांक एमएच ०९ सी वाय ४४६५) दत्त मंदिराशेजारी जोरदार धडक दिली. ही धडक इतकी भीषण होती की टेम्पो उलट्या दिशेने आल्यामुळे हा अपघात झाल्याचे प्रत्यक्षदर्शींनी सांगितले.

या अपघातात दुचाकीवरील एकाच कुटुंबातील तीन सदस्यांनी आपले प्राण गमावले. मृतांमध्ये भाऊ आणि बहीण यांचा समावेश आहे.

मृतांची नावे:

  1. श्रीकांत बाबासो कांबळे (वय अंदाजे ३०/३५, रा. तरसांबळे) – जागीच मृत्यू.
  2. कौशिक सचिन कांबळे (वय २, पुतणी/भाची) – जागीच मृत्यू.
  3. दीपाली गुरुनाथ कांबळे (वय अंदाजे ३०/३१, बहीण, रा. शेंडूर, ता. कागल) – उपचारादरम्यान मृत्यू.

या अपघातात अथर्व गुरुनाथ कांबळे (श्रीकांतचा मुलगा, वय अंदाजे ८, रा. शेंडूर, ता. कागल) हा गंभीर जखमी झाला आहे. त्याला तातडीने प्रथमोपचारानंतर पुढील उपचारासाठी कोल्हापूर येथील सीपीआर रुग्णालयात दाखल करण्यात आले असून त्याची प्रकृती चिंताजनक असल्याचे कळते.

मिळालेल्या माहितीनुसार, मृ्तक श्रीकांत कांबळे यांच्या कुटुंबावर काही दिवसांपूर्वीच दुःखाचा डोंगर कोसळला होता; त्यांची एक लहान मुलगी अवघ्या काही दिवसांपूर्वीच दगावली होती. दिवाळीच्या तोंडावरच हा मोठा आघात झाल्याने कांबळे कुटुंबावर दुःखाचा डोंगर कोसळला आहे. अपघात घडल्यानंतर संतप्त नागरिकांनी घटनास्थळी मोठी गर्दी केली. मृतांच्या नातेवाईकांनी आक्रोश केला. काही नागरिकांनी अपघात घडवणाऱ्या आयशर टेम्पोच्या काचा फोडल्याचाही प्रकार घडला. अपघातानंतर टेम्पो चालक घटनास्थळावरून पसार झाला असून पोलीस त्याचा शोध घेत आहेत. या घटनेची नोंद राधानगरी पोलीस ठाण्यात करण्यात आली असून, पोलीस निरीक्षक संतोष गोरे यांच्या मार्गदर्शनाखाली पोलीस पुढील तपास करत आहेत. अपघातस्थळी झालेल्या गर्दीमुळे महामार्गावर काही काळ वाहतुकीची कोंडी झाली होती, ती पोलिसांनी सुरळीत केली.

Related Articles

Leave a Reply

Your email address will not be published. Required fields are marked *

Back to top button