सोशल मीडियावर चाकू-कोयत्यांसह व्हिडिओ तयार करणारे युवक पोलिसांच्या ताब्यात – करवीर पोलिसांची तत्काळ कारवाई!
कोल्हापूर (सलीम शेख) : कोल्हापूर–रत्नागिरी महामार्गावरील चिखली फाटा येथील ओमकार हॉटेलजवळ काही युवकांनी हातात चाकू व ‘कोयता’सारखी हत्यारे घेऊन सोशल मीडियासाठी व्हिडिओ तयार केला. हा व्हिडिओ अल्पावधीतच सोशल मीडियावर व्हायरल झाला. या प्रकाराची माहिती मिळताच करवीर पोलिसांनी तातडीने कारवाई करत सर्व संबंधित युवकांना ताब्यात घेऊन त्यांच्या विरुद्ध प्रतिबंधात्मक कारवाई केली आहे.
घटनेची गंभीरता लक्षात घेऊन पोलीस निरीक्षक किशोर शिंदे यांनी तातडीने पोलिसांचे पथक तयार केले. या पथकात पोलीस हेडकॉन्स्टेबल सुभाष सरवडेकर, सुजय दावणे, रणजीत पाटील, राहुल देसाई, संजय काशीद तसेच पोलीस कॉन्स्टेबल अमोल चव्हाण, विजय पाटील आणि प्रकाश कांबळे यांनी सहभाग घेतला.
पोलिसांनी अल्पावधीतच व्हिडिओतील युवकांचा शोध लावून त्यांना ताब्यात घेतले. सार्वजनिक शांततेला धोका निर्माण होऊ नये आणि अशा प्रकारच्या कृत्यांना आळा बसावा म्हणून त्यांच्या विरोधात प्रतिबंधक कारवाई करण्यात आली आहे.
करवीर पोलीस ठाण्याचे निरीक्षक किशोर शिंदे यांच्या मार्गदर्शनाखाली ही कारवाई करण्यात आली असून पुढील तपास सुरू आहे.
