कोल्हापूर (सलीम शेख) : कोल्हापूर शहरातील महत्त्वाच्या परिख पूल रोडचे दुरुस्ती आणि सुधारणा काम आजपासून सुरू झाले आहे. या पार्श्वभूमीवर वाहतुकीसाठी तात्पुरती एकेरी व्यवस्था लागू करण्यात आली आहे.
वाहतूक विभागाकडून मिळालेल्या माहितीनुसार, सीबीएस कडून परिख पूल मार्गे राजारामपुरीकडे जाणारी वाहतूक सुरू ठेवण्यात आली आहे. तर, राजारामपुरीकडून सीबीएसकडे येणाऱ्या वाहनांना बीएसएनएल चौक मार्गे किंवा गवत मंडई रोड – मलबार चौक मार्गे वळवण्यात आले आहे.
या संदर्भात माहिती देताना शहर वाहतूक शाखेचे पोलीस निरीक्षक नंदकुमार मोरे यांनी सांगितले की, “कामाच्या कालावधीत नागरिकांनी पर्यायी मार्गांचा वापर करावा. काही काळ वाहतुकीत कोंडी होण्याची शक्यता असल्याने वाहनचालकांनी संयम आणि सावधगिरी बाळगावी.”
दरम्यान, परिख पूल रोडवरील दुरुस्तीचे काम पूर्ण होईपर्यंत ही तात्पुरती वाहतूक व्यवस्था लागू राहणार आहे.
