कोल्हापूर दक्षिण मतदारसंघातील विकासकामांना गती; जिल्हाधिकारी कार्यालयात महत्वपूर्ण बैठक संपन्न!
कोल्हापूर (कोटा न्यूज नेटवर्क): कोल्हापूर दक्षिण विधानसभा मतदारसंघासह शहर परिसरातील विविध विषयांवर तातडीने कार्यवाही करण्याच्या उद्देशाने, जिल्हाधिकारी कार्यालयात जिल्हाधिकारी अमोल येडगे आणि आमदार अमल महाडिक यांच्या प्रमुख उपस्थितीत काल एक व्यापक बैठक घेण्यात आली. या बैठकीत अनेक महत्वपूर्ण निर्णय घेण्यात आले आणि विविध विभागांना विकासकामांना गती देण्याच्या सूचना देण्यात आल्या.
यावेळी महाराष्ट्र जीवन प्राधिकरण, एमआयडीसी, पोलीस, महानगरपालिका, सार्वजनिक बांधकाम विभाग, महसूल, क्रीडा, भूमी अभिलेख यांसारख्या विविध महत्त्वाच्या विभागांचे वरिष्ठ अधिकारी उपस्थित होते.
शेंडा पार्क येथील शासकीय जमिनीमध्ये विविध शासकीय कार्यालयांना मंजूर झालेल्या जमिनीच्या हस्तांतरणावर सविस्तर चर्चा झाली.
कोल्हापूर महानगरपालिकेच्या मध्यवर्ती प्रशासकीय इमारतीसह अन्य इमारतींसाठी दिलेल्या जमिनीची तात्काळ मोजणी करून अंतर्गत रस्त्यांची व्यवस्था करण्याच्या सूचना जिल्हाधिकाऱ्यांनी दिल्या.
जिल्हा कडा संकुल आणि विभागीय फुटबॉल प्रशिक्षण केंद्रासाठी आवश्यक असलेली जागा तातडीने निश्चित करण्यासंदर्भात बैठकीत चर्चा झाली.दूधगंगा उजव्या कालव्याच्या अपूर्ण कामासाठी आवश्यक असलेल्या भूसंपादनाचा तात्काळ आराखडा तयार करण्याच्या सूचना पाटबंधारे विभागाला देण्यात आल्या.
गांधीनगरसह १३ गावांच्या पाणीपुरवठा योजनेसाठी महाराष्ट्र जीवन प्राधिकरण, पाटबंधारे विभाग, सार्वजनिक बांधकाम विभाग आणि राष्ट्रीय महामार्ग प्राधिकरण यांनी समन्वय साधून कालबद्ध कार्यक्रम राबवावा, अशा सूचना दिल्या गेल्या.
कोल्हापूर शहर आणि परिसरातील पोलीस ठाण्यांच्या कार्यक्षेत्रात अत्याधुनिक सीसीटीव्ही कॅमेरे बसवण्यासाठी ₹ ३० कोटी रुपयांचा निधी जिल्हा नियोजन समितीमधून देण्याची मागणी जिल्हाधिकाऱ्यांकडे करण्यात आली.
राष्ट्रीय महामार्गावरील वाहतूक कोंडीची समस्या सोडवण्यासाठी राष्ट्रीय महामार्ग प्राधिकरण आणि पोलीस प्रशासनाने संयुक्त मोहीम राबवण्याचा निर्णय झाला.
राष्ट्रीय महामार्ग प्राधिकरणाकडून पोलीस प्रशासनाच्या मदतीसाठी ट्रॅफिक वॉर्डन नेमण्यात यावेत, असे महत्त्वपूर्ण निर्णयही या बैठकीत घेण्यात आले.
जिल्हाधिकारी येडगे यांनी सर्व विभागांना, नागरिकांच्या समस्या आणि विकासकामे वेळेत पूर्ण करण्याची ताकीद दिली असून, या कामांचा आढावा नियमितपणे घेतला जाईल, असे स्पष्ट केले.
