कोल्हापूर दक्षिण मतदारसंघातील विकासकामांना गती; आमदार अमल महाडिक यांनी घेतला आढावा!

कोल्हापूर (सलीम शेख ) : कोल्हापूर दक्षिण विधानसभा मतदारसंघातील सार्वजनिक बांधकाम विभागाच्या (PWD) माध्यमातून सुरू असलेल्या विविध विकासकामांना गती देण्यासाठी आमदार अमल महाडिक यांनी नुकतीच संबंधित अधिकाऱ्यांसमवेत आढावा बैठक घेतली. मतदारसंघातील महत्त्वाची कामे जलदगतीने आणि उच्च दर्जाची व्हावीत, यासाठी त्यांनी यावेळी अधिकाऱ्यांना महत्त्वपूर्ण सूचना केल्या. वैद्यकीय व शैक्षणिक इमारतींचा विशेष आढावा बैठकीत प्रामुख्याने शेंडा पार्क येथील राजर्षी छत्रपती शाहू महाराज वैद्यकीय महाविद्यालयासह अन्य महत्त्वाच्या इमारतींच्या बांधकामाचा सद्यस्थितीचा आढावा घेण्यात आला. यासोबतच, शिवाजी विद्यापीठातील विविध इमारती, सारखी उपकेंद्राची इमारत, तसेच शासकीय अभियांत्रिकी महाविद्यालयाच्या सुरू असलेल्या बांधकामाची प्रगती आमदार महाडिक यांनी जाणून घेतली. ही सर्व कामे वेळेत पूर्ण करण्यावर त्यांनी भर दिला. रस्ते व कनेक्टिव्हिटीवर लक्ष
मतदारसंघातील सार्वजनिक बांधकाम विभागाकडे असलेले रस्ते दर्जेदार आणि टिकाऊ करण्यासंदर्भात आमदार महाडिक यांनी अधिकाऱ्यांना स्पष्ट सूचना दिल्या. याव्यतिरिक्त, कोल्हापूर विमानतळाकडे जाणाऱ्या रस्त्यांचे काँक्रिटीकरण करण्यासाठी तातडीने शासनाकडे प्रस्ताव सादर करण्याच्या सूचनाही त्यांनी अधिकाऱ्यांना यावेळी दिल्या, जेणेकरून विमानतळ कनेक्टिव्हिटी अधिक मजबूत होईल.
या आढावा बैठकीला आमदार अमल महाडिक यांच्यासह सार्वजनिक बांधकाम विभागाचे सर्व संबंधित प्रशासकीय अधिकारी उपस्थित होते. या सूचनांमुळे मतदारसंघातील विकासकामांना अधिक वेग मिळेल.




