कोल्हापूर (प्रतिनिधी : बाळासो कांबळे): तुर्केवाडी, ता. चंदगड येथील महादेवराव वांद्रे बी.एड. महाविद्यालयावर अनुसूचित जाती (SC) च्या विद्यार्थ्यांची आर्थिक पिळवणूक करून त्यांचा छळ केल्याबद्दल तातडीने फौजदारी गुन्हा दाखल करण्याची मागणी रिपब्लिकन पक्षाचे जिल्हा सचिव सतिश माळगे यांनी केली आहे.
या महाविद्यालयाकडून विद्यार्थ्यांची पिळवणूक केली जात असून त्यांना वेठीस धरले जात आहे. या गंभीर प्रकाराबद्दल महाविद्यालयाची मागील तीन वर्षांच्या कागदपत्रांची कसून तपासणी करण्यात यावी, अशी मागणी माळगे यांनी केली आहे. कागदपत्रांमध्ये अनेक तफावत आढळण्याची शक्यता असून, चुकीची कागदपत्रे सादर करून समाजकल्याण खात्याचीही दिशाभूल केली जात असल्याचे त्यांचे म्हणणे आहे. या प्रकरणी महाविद्यालयाच्या तीन वर्षांच्या कागदपत्रांची तपासणी करून संबंधित महाविद्यालयाची मान्यता त्वरित रद्द करावी, अशी मागणी रिपब्लिकन पक्षाच्या शिष्टमंडळाने समाजकल्याणचे सहायक आयुक्त सचिन साळे साहेब यांच्या भेटीदरम्यान केली. सतिश माळगे यांच्या नेतृत्वाखालील या शिष्टमंडळात प्रवीण आजरेकर, संबोधी कांबळे, भरमू शिंदे, सचिन सुरूतेकर, अशोक चव्हाण यांच्यासह रिपब्लिकन पक्षाचे कार्यकर्ते उपस्थित होते. त्यांनी सहायक आयुक्तांना निवेदन देऊन या प्रकरणाची गंभीरता लक्षात आणून दिली आणि तातडीच्या कारवाईची मागणी केली.
