अखेर लोकशाहीर गणपती सातपुते यांच्या निधनाने पहाडी बुलंद आवाज अखेर काळाच्या पडद्याआड

गोकुळ शिरगाव (सलीम शेख) : आपल्या सुमधुर पहाडी आवाजाने लहानापासून थोरांपर्यंत,खेड्यापासून शहरापर्यंत रसिक मनावर अधिराज गाजवलेले लोटेवाडी (ता. भुदरगड) येथील लोकशाहीर गणपती कृष्णा सातपुते यांच्या निधनाने या लोक कलाकाराने डफावर मारलेली थाप आणि पहाडी बुलंद आवाज अखेर काळाच्या पडद्याआड गेला.रसिक श्रोत्यांच्या लोकसंगतीतील शाहिरी गाण्याची परंपरा पुढे चालविण्यासाठी शिष्य वर्गाने कंबर कसली आहे.

एक निष्ठावंत,स्वाभिमानी,संवेदनशील , हळव्या मनाच्या या लोकशाहीराने आपली संपूर्ण हयात शाहिरी गाण्यातून गेली ४० वर्ष लोकसंस्कृती, लोकप्रबोधन, जनजागृती, कार्यासाठी खर्ची केली होती. एक गिरणी कामगार ते शाहीर अशी त्यांची ओळख होती. भुदरगड तालुक्यातील पंचक्रोशी गावागावांमध्ये त्यांचे शाहिरी गाण्याचे कार्यक्रम रंगत होते. वयाच्या ८६ व्या वर्षी त्यांच्या निधनाने पोकळी निर्माण झाली आहे. शाहिरी गाण्याच्या छंदामुळे त्यांनी मुंबई मधील राहत्या घरावर तुळशीपत्र ठेवले होते. लोकप्रबोधनातील त्यांच्या कार्याची दखल आकाशवाणी ने घेतली होती. तर अनेक शाहिरी कार्यक्रमात त्यांनी आपल्या बुलंद आवाजाने रसिकांना घायाळ केले होते. एड्स जनजागृती कार्यातील सामाजिक कार्यकर्ते मोहन सातपुते व माजी उपसरपंच बबन सातपुते, बाजीराव सातपुते यांचे ते वडील होते. त्यांच्या निधनाने त्यांनी निर्माण केलेल्या शिष्य वर्गातून त्यांची ही शाहिरी चळवळ पुढे घेऊन जाण्यासाठी त्यांच्या दिवसाकार्यादिवशी संपर्ण शाहिरी गण गुरुवार १६ ऑक्टोबर २५ रोजी एकत्र येत येऊन लोकशाहीर गणपती सातपुते यांच्या स्मृती जागृत करण्याचे काम करणार आहेत. असा हा एक हरहुन्नरी, निष्ठावंत लोकशाहीर काळाच्या पडद्या  आड गेला आहे.