माणगाव येथे मनमिळाऊ केशकर्तन व्यावसायिकाचा संशयास्पद मृत्यू; परिसरात शोककळा!

हातकणंगले (सलीम शेख) ) : हातकणंगले तालुक्यातील माणगाव परिसरात घडलेल्या एका दुर्दैवी घटनेने संपूर्ण गावात शोककळा पसरली आहे. माणगाव फाटा येथे केशकर्तन (हेअर सलून) व्यवसाय करणारे भरत भोपाल बन्ने (वय ३२) या तरुणाचा राहत्या घरात संशयास्पद परिस्थितीत मृत्यू झाल्याची घटना गुरुवार, ९ ऑक्टोबर २०२५ रोजी सकाळी साडेनऊ ते अकरा वाजण्याच्या दरम्यान उघडकीस आली. भरत बन्ने यांचा मनमिळाऊ आणि हसतमुख स्वभाव असल्यामुळे ते माणगाव व परिसरातील अनेक नागरिकांच्या परिचयाचे होते. आपल्या व्यवसायातून त्यांनी अनेक चांगले संबंध जपले होते. त्यांच्या अचानक झालेल्या आणि संशयास्पद निधनामुळे माणगाव परिसरात सर्वत्र हळहळ व्यक्त केली जात आहे.
सदर दुर्दैवी घटनेची माहिती माणगावचे पोलीस पाटील करसिद्ध जोग यांनी तातडीने हातकणंगले पोलिसांना दिली. माहिती मिळताच पोलीस पथक तात्काळ घटनास्थळी दाखल झाले आणि त्यांनी परिस्थितीचा पंचनामा केला. या प्रकरणी हातकणंगले पोलीस ठाण्यात संशयास्पद मृत्यू म्हणून नोंद (दाखल अंमलदार पोलीस हेड कॉन्स्टेबल डिसोजा) करण्यात आली आहे. भरत बन्ने यांच्या मृत्यूमागील नेमके कारण काय आहे, याचा तपास पोलीस करत आहेत.
घटनेचा पुढील तपास बीट अंमलदार, सहाय्यक फौजदार चव्हाण यांच्या मार्गदर्शनाखाली सुरू आहे.




