प्रविणसिंह पाटील यांच्या भाजप प्रवेशामुळे कागल तालुक्यात ‘नवा जोश’!

मुरगूड: (प्रतिनिधी-बाळासो कांबळे): जिल्ह्यातील राजकारणाची पंढरी म्हणून ओळखल्या जाणाऱ्या कागल तालुक्यातील मुरगूड गावचे माजी नगराध्यक्ष प्रविणसिंह पाटील यांनी मंगळवार, ७ ऑक्टोबर रोजी मुंबईत आपल्या असंख्य कार्यकर्त्यांसह भारतीय जनता पक्षामध्ये (भाजप) प्रवेश केला. प्रविणसिंह पाटील यांच्या भाजप प्रवेशाने मुरगूड शहर आणि संपूर्ण कागल तालुक्यात कार्यकर्त्यांमध्ये कमालीचा नवा उत्साह संचारला असून, रगूड येथील शिवतीर्थ येथे कार्यकर्त्यांनी जोरदार आतिषबाजी करत आणि साखर-पेढे वाटून आनंद व्यक्त केला. प्रविणसिंह पाटील हे मुरगूड गावची परंपरा आणि सामाजिक रूढी जपण्याचे कार्य निष्ठापूर्वक करत आले आहेत. त्यांच्या घराण्याला गावासाठी आणि समाजासाठी केलेल्या कार्याचा मोठा वारसा आहे. विशेषतः बिद्री साखर कारखान्याच्या उभारणीत त्यांच्या वडिलांचा (अण्णाजींचा) सिंहाचा वाटा आहे. त्यांच्या मार्गदर्शनाखाली प्रविणसिंह दादांनी काम करत आपला राजकीय गट बाजूला ठेवून सर्वसामान्य शेतकऱ्यांची कामे केली आहेत. बिद्री साखर कारखान्याच्या संचालक मंडळात त्यांचा अनुभव पक्षाला आणि कारखान्याच्या हितासाठी मोलाचा ठरणार आहे.

प्रविणसिंह पाटील यांच्या राजकीय अनुभवामुळे आणि कणखर नेतृत्वामुळे मुरगूड शहरासह आसपासच्या गावांमध्ये त्यांचे असंख्य निष्ठावान कार्यकर्ते आहेत. त्यांनी शेतकरी आणि सर्वसामान्य जनतेच्या हितासाठी कार्य केले आहे. अनेकांच्या घरी सुखाचा आणि आनंदाचा दिवा त्यांनी पेटवला आहे. “प्रत्येक कार्यकर्त्याच्या पाठीशी ढाली सारखे उभे राहणे, कार्यकर्त्यांना हाताच्या फोडाप्रमाणे जपणे” ही त्यांची ओळख आहे. राजकारणातून व समाजकारणातून त्यांना संपवण्यासाठी अनेक राजकीय डाव (कुस्तीप्रमाणे कलाजंग डाव) खेळले गेले, मात्र ते प्रत्येक वेळी या डावातून सहीसलामत बाहेर पडून हिऱ्याप्रमाणे चमकत राहिले. यामुळेच त्यांची प्रतिमा ‘लढवय्या नेता’ अशी निर्माण झाली आहे. (राजकीय वर्तुळात ‘प्रविणसिंह दादा फक्त नावच पुरे आहे’ असे म्हटले जाते.) प्रविणसिंह पाटील यांच्या भाजप प्रवेशाचे स्वागत करताना मुंबई येथे झालेल्या कार्यक्रमात भाजपचे ज्येष्ठ नेते माजी मंत्री चंद्रकांतदादा पाटील यांनी खास कोल्हापुरी शैलीत त्यांचे कौतुक केले. “कागल तालुक्यातील प्रविणसिंह पाटील लोकनियुक्त मुरगूड नगराध्यक्ष आहेत, तसेच ते ३० वर्षे नगरसेवक आणि विश्वनाथराव पाटील सह. बँक लि. मध्ये २० वर्षे चेअरमन आहेत. माणूस बी दमदार, शरीर बी दमदार! (मुरगूड नगर परिषद जिंकली असं समजा…!)” असे उद्गार चंद्रकांतदादा पाटील यांनी यावेळी काढले.