प्रामाणिकपणाचा आदर्श! एस.टी. वाहकाने प्रवाशाचे अडीच लाखाचे सोन्याचे दागिने केले परत!
फलटण सातारा (कोटा न्यूज नेटवर्क) : ‘माणुसकी अजूनही जिवंत आहे’ याचा प्रत्यय आज दिनांक ३/१०/२०२५ सातारा विभागात फलटण आगाराच्या एका कर्तव्यदक्ष वाहकाने दिला. सातारा-फलटण बसफेरीवर कर्तव्य बजावत असताना वाहक अक्षय राजेंद्र जाधव यांना प्रवाशाची एक पर्स सापडली.
पर्स उघडून बघितली असता, त्यामध्ये सुमारे २,५०,००० (अडीच लाख) रुपये किमतीचे सोन्याचे दागिने (नेकलेस आणि अंगठी) आढळून आले. इतकी मोठी रक्कम आणि मौल्यवान वस्तू असूनही, अक्षय जाधव यांनी जराही मोह न ठेवता आपला प्रामाणिकपणा सिद्ध केला.
बस फलटणमध्ये पोहोचल्यानंतर, अक्षय जाधव यांनी तातडीने संबंधित व्यक्तीचा शोध घेतला. त्यांनी वस्तूचे मालक संजय संपतराव भोईटे (रा. हिंगणगाव, फलटण) यांची भेट घेऊन, दागिन्यांची व वस्तूंची खात्री करून ओळख पटवली आणि हे मौल्यवान दागिने त्यांच्याकडे सुरक्षितपणे सुपूर्द केले.
एस.टी. बसमधील लाखो रुपयांचे दागिने परत केल्याबद्दल वाहक अक्षय जाधव यांच्या प्रामाणिक कार्याची फलटण आगारामध्ये आणि प्रवाशांमध्ये सर्वत्र चर्चा होत आहे. फलटण आगारामार्फत त्यांचे विशेष अभिनंदन व कौतुक करण्यात येत आहे. अक्षय जाधव यांनी दाखवलेल्या या प्रामाणिकपणामुळे महाराष्ट्र राज्य मार्ग परिवहन महामंडळाची (MSRTC) प्रतिमा उंचावली आहे.
