प्रामाणिकतेचा आदर्श: शिक्षक संजय भोसले यांनी परत केले साडेचार लाखांचे चांदीचे दागिने!
पंढरपूर/माळशिरस (कोटा न्यूज नेटवर्क): विद्येचे मंदिर असणाऱ्या शाळेत विद्यार्थ्यांमध्ये मूल्यांची शिकवण देणाऱ्या एका शिक्षकाने आपल्या प्रामाणिक कृतीतून समाजासमोर एक अनोखा आदर्श उभा केला आहे. विद्या विकास मंदिर, उंबरे (पागे), ता. पंढरपूर येथील चित्रकला शिक्षक संजय जनार्दन भोसले (रा. जांबुड सेक्शन नं. १५, ता. माळशिरस) यांनी रस्त्यावर सापडलेले तब्बल ४ लाख ५० हजार रुपये किमतीचे चांदीचे दागिने त्वरित मूळ मालकाला परत करून माणुसकीचे दर्शन घडवले आहे.
घटनेनुसार, शिक्षक संजय भोसले हे श्रीपुर ते अकलूज (थोरली चौकी) मार्गावरून प्रवास करत असताना त्यांना रस्त्यावर एक पिशवी पडलेली दिसली. त्यांनी ती उघडून पाहिली असता, त्यात अंदाजे ४ लाख ५० हजार रुपये किमतीची चांदी आणि त्यासंबंधीची पावती पुस्तके असल्याचे त्यांच्या निदर्शनास आले.
पिशवीमध्ये सापडलेल्या पावती पुस्तकावरील संपर्क क्रमांकावरून त्यांनी तात्काळ फोन केला. त्यावेळी ही पिशवी श्रीपूर येथील सुप्रसिद्ध सोन्या-चांदीचे व्यापारी अजित काटकर यांची असल्याचे समजले. कोणताही विचार न करता, शिक्षक भोसले यांनी तात्काळ काटकर यांच्याशी संपर्क साधून त्यांना पिशवी परत केली.
व्यापारी काटकर यांनी आपली लाखो रुपयांची मालमत्ता परत मिळाल्याने कृतज्ञता व्यक्त केली आणि शिक्षक भोसले यांचा पुष्पहार देऊन सत्कार केला.
या घटनेमुळे शिक्षक संजय भोसले यांनी “प्रामाणिकपणा हीच खरी संपत्ती” हा मोलाचा संदेश समाजाला दिला आहे. जांबुड सेक्शन नं. १५, श्रीपुर, बोरगाव, महाळुंग व उंबरे (पागे) परिसरातील नागरिकांनी त्यांच्या या आदर्शवत गुणाबद्दल त्यांचे भरभरून कौतुक केले असून अभिनंदन केले आहे. शिक्षक भोसले यांच्या या कृतीमुळे शिक्षण क्षेत्राचा आणि माणुसकीचा गौरव वाढला आहे.
